Во Норвешка сè повеќе расте притисокот, по двата неуспешни референдуми, да се покрене нова дебата за можното членство во европскиот блок
Министерот за надворешни работи на Норвешка, Еспен Барт Ајде вели дека земјата повторно го преиспитува својот однос со Европската Унија поради променетите глобални околности и растечкото влијание на политиките на САД и на Кина.
Во Норвешка сè повеќе расте притисокот, по двата неуспешни референдуми, да се покрене нова дебата за можното членство во европскиот блок.
Ајде наведе дека околностите значително се променети од 1994 година и дека ЕУ сега користи инструменти кои претходно не беа активни.
– Овој луд свет надвор, со она што се случува со Кина и со САД, ја принудува ЕУ да користи алатки од кутијата кои претходно не беа активни – изјави тој за Фајненшел тајмс, додавајќи дека станува збор за трговската политика и за царинската унија во која „не сакаат да бидат“.
Ајде наведе дека бенигниот свет, во кој беа одржани претходните референдуми во 1972 и во 1994 година е заменет со значително понестабилно глобално опкружување, поради што Норвешка мора пореално да го согледа својот однос со ЕУ.
– Рековме „не“ во 1972 година поради рибата и повторно во 1994 година, главно поради рибата и земјоделството – рече норвешкиот министер, со оценка дека тие прашања беа „толку контроверзни што уништија бракови и семејства, оставајќи ги Норвежаните со посттрауматско стресно растројство“.
Норвешка, иако е дел од единствениот европски пазар, останува надвор од ЕУ, а рибарството и земјоделството беа клучните причини за противење на членството. Морската храна е најголемиот извозен сектор на земјата по нафтата и гасот.
Шефот на норвешката дипломатија рече и дека норвешкото богатство од нафта и гас придонесува за чувството на економска независност, но додаде дека, доколку референдумот би бил утре, тој би гласал за ЕУ, со напомена дека тоа не значи дека е дојден моментот за негово распишување.
Иако дел од норвешкиот политички врв го поддржува членството, анкетите покажуваат дека мнозинството граѓани и понатаму го отфрлаат влезот во ЕУ, поради што владејачката Лабуристичка партија не планира нов референдум во скоро време.
ЗА НАС
ОhridSky е ваш доверлив извор за сеопфатно и избалансирано покривање на вестите. Со посветеност на интегритет и точност, обезбедуваме длабинско известување кое ги открива приказните што се најважни.
Links
© 2025 OhridSky. Сите права задржани.
