Во неколку делови од Скопје во изминатите денови граѓани пријавиле дека забележале змии, што предизвика вознемиреност во јавноста, особено затоа што дел од змиите биле видени во густо населени и често посетувани градски локации

Во неколку делови од Скопје во изминатите денови граѓани пријавиле дека забележале змии, што предизвика вознемиреност во јавноста, особено затоа што дел од змиите биле видени во густо населени и често посетувани градски локации.

Според сведоштвата на граѓани, змии биле забележани на повеќе локации: на патниот правец меѓу Горно и Долно Лисиче на 29 април, во близина на Кванташкиот пазар на 11 мај, како и во населбата Аеродром, на улицата „Владимир Комаров“ број 27, каде змија била забележана на 10 мај. Фотографии и видеа од змии брзо се проширија на социјалните мрежи, дополнително засилувајќи ја загриженоста кај граѓаните.

Иако ваквите појави не се невообичаени во пролетниот и летниот период, кога повисоките температури ги активираат влекачите и ги поттикнуваат да излегуваат од нивните природни живеалишта, проблемот повторно ја отвора темата за одржувањето на јавните зелени површини во урбаните средини.

- Advertisement -

Граѓаните сè почесто реагираат дека тревниците, празните парцели и дивите депонии создаваат услови за појава на вакви животни, особено во периферните и недоволно одржувани делови од градот.