Владата го задолжи министерството за финансии да обезбеди пари за проектот

Владата ја почна постапката за изградба на брзата пруга на Коридорот 10, од границата со Грција до границата со Србија, информира вицепремиерот и  министер за транспорт и врски Александар Николоски.

Владата вчера го задолжи Министерството за финансии, на меѓународниот финансиски пазар, низ  отворена и транспарентна процедура, да изнајде финансии за спроведување на овој проект.

-Должината на пругата треба да се некаде повеќе од 200 километри, истата треба да е двоколосечна, во патничкиот сообраќај треба да има брзина од 160км/ч, а во карго сообраќајот треба да има брзина од најмалку 120км/ч и рокот за реализација треба да е некаде 5 години. Очекуваме во текот на летните месеци да имаме поконкретни детали околу финансирањето на проектот, и секако да одиме кон фаза на избор на изведувач, кој што би почнал уште од оваа есен да работи на теренот. Ќе работиме во заеднички проект, каде што и проектирањето и изведбата ќе бидат од еден изведувач и најверојатно ќе се оди според FIDIC правилата или според така наречен жолт FIDIC или според така наречен среден FIDIC – рече Николоски.

- Advertisement -

Претходно владата формира Координативно тело кое ќе ја следи реализацијата на Договорот помеѓу Македонија и Велика Британија.

-Членови на координативното тело покрај мене се: министерот за надворешни работи и надворешна трговија, министерката за енергетика, минерални суровини и рударство, Министерот за дигитална трансформација, министерот за здравство, директорот на Македонски железници-Инфраструктура, генералниот секретар на Владата и Државниот правобранител, а телото може да кани и други гости по потреба, кои што ќе ја следат реализацијата на Договорот помеѓу Македонија и Велика Британија -рече Николоски.