Вкупната вредност на  онлајн трансакциите во првиот квартал од годинава  изнесува 266 милиони евра, што претставува раст од 18,1% во однос на истиот период минатата година

Вкупната вредност на  онлајн трансакциите во првиот квартал од годинава  изнесува 266 милиони евра, што претставува раст од 18,1% во однос на истиот период минатата година. Во оваа вредност се вклучени онлајн купувањата на македонските граѓани кај домашни и странски е-продавници, како и купувањата на странски потрошувачи кај македонските е-трговци, соопшти Асоцијацијата на е-тровци.

Притоа во македонските е- продавници завршиле 156 милиони евра, од кои  повеќе од 140 милиони евра се на домашни потрошувачи и 16,2 милиони евра на странски купувачи.

Македонските потрошувачи продолжуваат активно да купуваат и од странски е-продавници, при што во првиот квартал реализирале онлајн трансакции во вредност од 109,7 милиони евра, што претставува раст од 20,3% во однос на истиот период минатата година.

- Advertisement -

Покрај растот на вредноста, продолжува да расте и бројот на онлајн купувања кое во првиот квартал од годинава е зголемено за 16,4% во однос на истиот период минатата година. Притоа, кон македонските е-трговци бројот на направените е-трансакции е зголемена за 17,5% во однос на лани.

Од Асоцијацијата забележуваат дека иако вкупната вредност на онлајн купувањата продолжува да расте, анализата покажува дека просечната вредност на една трансакција кај домашните е-продавници благо се намалува.

Кај трансакциите од домашни картички кон домашни е-трговци, просечната вредност се намалила од 36 на 35,3 евра односно за 2,2%. Овој тренд е во согласност со фактот дека бројот на трансакции  расте побрзо од нивната вкупна вредност што укажува дека македонските потрошувачи трошат помалку по трансакција кај домашните продавници. Кај странските картички кон домашните е-трговци, просечната вредност се намалила од 41,3 на 37,9 евра  што исто така укажува дека странските купувачи реализираат повеќе поединечни купувања.

Спротивно на тоа, кај трансакциите од домашни картички кон странски е-трговци, просечната вредност пораснала од 31,3 на 33,6 евра.

Вкупно, просечната вредност на една онлајн трансакција изнесувала 34,7 евра, што претставува раст од 1,5% во однос на истиот период минатата година.

Во текот на првото тромесечје од 2026 година, регистрирани се 59 новоотворени онлајн продажни места, што претставува значаен показател за зголемена понуда и заинтересираност на бизнисите да влезат во е-просторот.