Виландер: Ѓоковиќ е најдобар во историјата, но Федерер е најголем

Матс Виландер, седумкратен гренд-слем шампион и поранешен светски број еден, го сподели своето мислење за статусот на најуспешните ѕвезди во овој спорт. Дискусијата беше поттикната од неодамнешниот прием на Роџер Федерер во Куќата на славните во Њупорт.

„За мене, Роџер е најголемиот тенисер во историјата од проста причина што беше најголемиот амбасадор на нашиот спорт. Токму затоа тој е најважниот играч што некогаш играл тенис – земајќи го предвид неговото однесување и сè што постигна“, објасни Виландер, истакнувајќи дека според него, никој немал толку позитивно влијание врз светот како легендарниот Швајцарец, пренесува „Спортклуб“.

Секако, споредбата со Новак беше неизбежна.

- Advertisement -

„Роџер е најголем во историјата, но тоа не значи дека бил најдобар. Ѓоковиќ е најдобар“, додаде тој.

Швеѓанецот исто така даде и една важна забелешка во врска со оваа споредба:

„Федерер беше најдоминантниот играч на својата генерација. Кога играше против Ѓоковиќ и Надал, тие беа помлади од него“, забележа тој, посочувајќи дека Роџер е пет години постар од Рафа и шест години постар од Новак.

Тој ги наброја и најголемите одлики на рекордерот по бројот на титули на Вимблдон:

„Тој секогаш беше ментално ангажиран 100 проценти. На секој меч и на секој турнир го даваше својот максимум. Тоа е она на што најмногу се восхитував. Тој победнички менталитет, како и неговата разновидна тактика и широкиот избор на удари… Роџер истовремено беше исклучително натпреварувачки настроен и исклучително креативен.“