Управата за јавни приходи во соработка со Заедницата на единиците на локалната самоуправа организираше обука за подготовка за воведување на системот е-Фактура на која учествуваа 80 претставници од општините и јавните претпријатија

Управата за јавни приходи (УЈП) во соработка со Заедницата на единиците на локалната самоуправа (ЗЕЛС) организираше обука за подготовка за воведување на системот е-Фактура на која учествуваа 80 претставници од општините и јавните претпријатија (ЈКП). На обуката беа презентирани функционалностите на овој систем и начинот на неговото користење, како и обврските и придобивките од електронското фактурирање.

Беше нагласено општините и јавните претпријатија што помасовно да пристапат кон тестирање на системот, со цел навремено да достават сугестии и предлози во насока на поедноставување на процесите и обезбедување на негова поголема ефикасност. За подобра комуникација со тимот на УЈП, беше побарано општините и јавните претпријатија кои досега не доставиле контакт-лице, тоа да го направат што поскоро.

Кај присутните посебно внимание предизвикаа дилемите околу можностите за испраќање масовни фактури од страна на јавните претпријатија кон граѓаните, можностите за интегрирање/поврзување на сегашните системи што ги користат одредени општини и јавните претпријатија со системот е-Фактура, како и можностите за користење на постојните валидни сертифицирани потписи на корисниците.

- Advertisement -

Претставниците од тимот на УЈП посочија дека во оваа пилот-фаза тестирањето може да се спроведе преку: директна интеграција на системот е-Фактура со деловните информациски системи на корисникот преку API интерфејс или преку Веб апликација. Во овој момент се тестираат повеќе функционалности на системот е-фактура, како што се креирање, прием, валидација, преземање, прифаќање, одбивање и сторнирање на е-фактура, се тестираат повеќе типови на документи и даночни индикатори, а во следниот период се планира постепено зголемување на опфатот на тестирањето до целосно вклучување на сите процеси, сите даночни индикатори и сите типови на документи.

На крајот од работилницата беа посочени платформите за цели на тестирањето:
– Потребната документација е достапна на линкот: https://efakturawiki.ujp.gov.mk
– Регистрација и доделување на привилегии за користење на системот е-фактура: https://eujptest.ujp.gov.mk/ureg
– Тест платформа за е-фактура: https://efakturatest.ujp.gov.mk (овластеното лице се најавува и регистрира валиден квалификуван сертификат)
– Контакт мејл за поддршка: Kontakt.eFaktura@ujp.gov.mk (на кој може да се достават сите прашања и предлози кои произлегле од тестирањето)

Оваа обука е од особено значење бидејќи јавните претпријатија претставуваат значаен сегмент од јавниот сектор и се меѓу најголемите издавачи на фактури во државата. Нивната навремена подготовка и активно вклучување во процесот се од клучно значење за успешната имплементација на системот е-Фактура и за обезбедување непречен премин кон целосно електронско фактурирање.