Турски државјанин приведен по контрола на мобилен тим

Турски државјанин на возраст од 26 години е лишен од слобода откако во товарно возило на гранично подрачје кај Куманово бил пронајден поголем количински товар од кожен материјал, соопштија надлежните органи.

Вчера во 16:15 часот мобилен тим од Мобилната единица за компензаторни мерки при Одделот за гранични работи и миграција, при движење од Куманово кон Крива Паланка, забележал товарно возило „мерцедес-бенз“ со косовски регистарски ознаки и го сопрел за контрола.

При деталниот преглед на возилото, управувано од Т.Б.К. (26) од Турција, во товарниот дел биле пронајдени шест вреќи со вкупно 118 парчиња кожен материјал, со проценета површина од околу 177 квадратни метри.

- Advertisement -

По насоки на дежурен јавен обвинител од Основното јавно обвинителство Куманово, лицето е лишено од слобода по член 278-б од Кривичниот законик, за „прикривање на стоки кои се предмет на криумчарење и царинска измама“.

Тој е спроведен во Полициската станица Куманово, каде што ќе следуваат понатамошни постапки, додека надлежните работат на целосно расчистување на случајот.