Трансродовата актерка се прослави со улогата на Џулс Вон во серијата „Еуфорија“

Хантер Шафер (27), актерката и манекенка која се прослави со улогата на Џулс Вон во серијата „Еуфорија“, откри дека во декември 2025 година направила операција на гениталиите, како дел од медицинската транзиција. Во интервју за списанието „Ел“ таа раскажала за одлуката и за закрепнувањето по интервенцијата.

– Во декември направив операција на гениталиите, што беше прекрасно искуство, и навистина многу ми се допаѓа – рекла Шафер, не криејќи го задоволството од одлуката.

Актерката објаснила дека долго време се обидувала да го прифати своето тело без дополнителни медицински интервенции. Сметала дека има нешто посебно во нејзиниот претходен изглед и сакала да види дали може да се чувствува удобно без операција.

- Advertisement -

– Долго време ја прифаќав родовата експанзивност на сопствениот идентитет и навистина сакав да се обидам да го прифатам телото што го имав претходно, бидејќи мислев дека има нешто навистина кул и храбро во тоа – раскажала таа.

Со текот на времето, сепак, сфатила дека начинот на кој сака да живее и да се претставува пред светот не се совпаѓа целосно со нејзиното претходно тело. На крајот одлучила дека медицинската транзиција е вистинскиот избор за неа.

„Јас сум жена, јас сум девојка“

Шафер, која уште како тинејџерка започнала со транзицијата, зборувала и за начинот на кој со текот на годините се менувало нејзиното разбирање на сопствениот идентитет.

– Мислам дека магичната работа кај квир-идентитетот е можноста за промена, проширување и растење, како и патувањето на кое се запознаваш себеси – рекла актерката.

Таа додала дека постои разлика меѓу теоретските идеи за родовиот идентитет и реалноста во која живее секој човек. За неа, најважно било да пронајде начин на кој ќе се чувствува удобно и автентично во сопственото тело.

– Јас сум жена. Јас сум девојка – порачала Шафер.

Таа нагласила дека искуството на секоја трансродова личност е различно и дека нејзината одлука не треба да се смета за правило или очекување за другите.

Закрепнувањето го поминала со помош на семејството и пријателите

Актерката открила и дека закрепнувањето по операцијата на почетокот на 2026 година било физички напорно. Изнајмила голем стан во кој можеле да ја посетуваат семејството и пријателите додека морала да мирува.

– Мислам дека мојата граница беше 150 чекори дневно, што е речиси ништо – раскажала таа за ограничувањата што ги имала по интервенцијата.

Шафер претходно зборувала и за тешкотиите со кои се соочувала поради тоа што е трансродова жена. Во 2025 година открила дека, откако ѝ бил украден пасошот, добила нов американски документ во кој половиот маркер бил наведен како машки, иако претходно веќе го имала законски сменето.

Актерката, сепак, не сака нејзиниот родов идентитет да биде единственото нешто по кое јавноста ќе ја препознава. Во интервју за „Џи-кју“ во 2024 година рекла дека напорно работела за да стигне таму каде што е и дека сака да биде препознаена и по својата актерска работа.

Шафер се прослави со „Еуфорија“, а меѓу нејзините понови проекти е и серијата „Блејд ранер 2099“, во која глуми покрај Мишел Јео. Со најновото интервју таа сподели уште еден личен дел од својата приказна, нагласувајќи дека патот до прифаќањето на себеси е различен за секого.