ТРАМП ТВРДИ ДЕКА ЗАСЛУЖУВА НОБЕЛОВА НАГРАДА ЗА МИР

Американскиот претседател Доналд Трамп, кој ја покрена воената интервенција против Иран и сè уште не успеа да постигне мир во Украина, денеска изјави дека треба да ја добие Нобеловата награда за мир, но призна дека се сомнева во своите шанси.

– Не знам каква ќе биде нивната одлука – рече Трамп, осврнувајќи се на Нобеловата награда за мир за 2026 година, чиј добитник Норвешкиот Нобелов комитет треба да го објави утре.

– Познати се по тоа што можеби не им ја доделуваат на луѓе како мене – додаде тој.

- Advertisement -

Откако минатата година се врати во Белата куќа, Трамп во повеќе наврати истакнуваше дека ја заслужува наградата, која се смета за едно од најпрестижните признанија во светот.

– Време е за тоа. Но, за мене беше голема чест што последниот пат ја добив посредно, од добитничка која рече дека никој во историјата не ја заслужува повеќе од претседателот Трамп – изјави тој пред новинарите во Овалната соба.

Венецуелската опозициска лидерка Марија Корина Мачадо во јануари му го подари на Трамп својот медал од Нобеловата награда за мир за 2025 година, барајќи поддршка од САД за нејзините активности во Венецуела. Сепак, наградата формално останува нејзина, бидејќи не може да се пренесе на друго лице.

Трамп смета дека треба да ја добие наградата затоа што, како што тврди, активно се вклучил во решавањето на осум конфликти откако ја презеде претседателската функција во јануари минатата година.

Лидерите на Камбоџа, Израел и Пакистан изјавија дека го номинирале Трамп за наградата, иако овие номинации не се независно потврдени.