Трамп: Путин и Зеленски наскоро ќе се сретнат

Според американскиот претседател Доналд Трамп, наскоро ќе биде организирана средба меѓу претседателите на Русија и Украина – Владимир Путин и Володимир Зеленски. Соединетите Држави, кои неодамна ги обновија своите напори за ставање крај на војната, исто така ќе овозможат одржување средба меѓу украинската и руската делегација во ноември.

Средба меѓу претседателите на Русија и Украина, Владимир Путин и Володимир Зеленски, ќе биде организирана наскоро, изјави денеска американскиот претседател Доналд Трамп: „Средбата ќе биде организирана многу наскоро и верувам дека може да се постигне значителен напредок“.

Мировните преговори во врска со војната во Украина – со посредство на САД – последен пат се одржаа во февруари, пред избувнувањето на војната меѓу САД/Израел и Иран. Во обид повторно да се заживеат мировните иницијативи, специјалниот пратеник на САД, Стив Виткоф, неодамна одржа одделни средби и со Зеленски и со Путин.

- Advertisement -

По овие разговори, Кремљ изрази подготвеност за продолжување на трилатералните преговори, кои се очекува да се одржат во Абу Даби во текот на првата половина од ноември. Зеленски изрази надеж дека разговорите ќе доведат до напредок кон мир. Тој најави дека Киев има намера на средбата да покрене неколку прашања, вклучително и можно запирање на нападите врз енергетската инфраструктура и прекин на огнот во Црното Море. Во меѓувреме, во своето обраќање во вторникот вечерта, Зеленски предупреди дека Русија во текот на изминатите две недели истрелала повеќе од сто балистички ракети кон Киев и неговата околина. „Правиме сè што е во наша моќ за да го заштитиме нашиот енергетски сектор, инфраструктурата и логистиката. Задачата е исклучително тешка“, продолжи тој, повторно повикувајќи ги сојузниците да ја зајакнат противвоздушната одбрана на Украина, пренесува германската новинска агенција ДПА.

Примирјето во украинскиот град Олешки влегува во втор ден
Хуманитарното примирје во областа на градот Олешки, во јужниот украински регион Херсон, влезе во својот втор ден, потврдија денеска двете страни во конфликтот. Украинскиот комесар за човекови права, Дмитро Лубинец, и руската омбудсманка за човекови права, Јана Лантратова, известија дека во текот на 30-те часа од почетокот на примирјето не е забележан ниту еден инцидент.

„Триесет часа од примирјето поминаа во Олешки без ниту еден инцидент“, изјави Лубинец. Лантратова, исто така, потврди дека немало инциденти во 30-те часа откако стапи на сила прекинот на огнот, пренесува француската новинска агенција АФП.

Примирјето во Олешки, кое стапи на сила рано во вторникот наутро, беше најавено минатата недела од првата дама на САД, Меланија Трамп. Во изјавата дадена во вторникот, таа наведе дека спроведувањето на примирјето е поместено за два дена порано и дека тоа опфаќа област што се протега надвор од самиот град, кој е под руска окупација. Руските сили го зазедоа Олешки на почетокот на инвазијата во февруари 2022 година. Градот, кој пред војната имаше нешто повеќе од 24.000 жители, беше тешко погоден од уништувањето на браната Каховка во 2023 година, што предизвика големи поплави долж реката Днепар. Двете страни во конфликтот меѓусебно се обвинуваат за уништувањето на браната.

За време на прекинот на огнот, предвидено е доставување вода, храна и лекови за околу 2.000 жители кои останале таму. Исто така, ќе се организираат активности за оние што сакаат да го напуштат градот.