ТРАМП ОДЛУЧИЛ, КИЕВ ДОБИВА ЛИЦЕНЦА ЗА „ПАТРИОТ“

Американскиот претседател Доналд Трамп донел конечна одлука Украина да добие лиценца за производство на ракети за системите „Патриот“, соопшти денеска украинскиот претседател Володимир Зеленски. Според него, Трамп лично му ја потврдил одлуката при нивната последна средба во Њујорк.

– На нашата последна средба претседателот Трамп ми нагласи дека донел конечна одлука. Украина ќе добие лиценци за производство на ракети „Патриот“ – изјави Зеленски, пренесуваат повеќе медиуми.

Само два дена претходно, на 23 септември, Стејт департментот соопшти дека конечна одлука за лиценцата сè уште не е донесена и дека разговорите продолжуваат.

- Advertisement -

Прашањето не е ново. Трамп уште во јули јавно рече дека САД ќе ѝ дадат на Украина право да произведува ракети за „Патриот“, но тогаш Зеленски нагласи дека допрва треба да се договорат техничките детали.

Од најава до конечна одлука

Преговорите продолжија и во следните месеци. На средбата меѓу Трамп и Зеленски во Њујорк на 22 септември, Киев официјално соопшти дека американските и украинските тимови работат на започнување производство на ракети-пресретнувачи за „Патриот“ во Украина.

Зеленски разговараше и со генералниот секретар на НАТО Марк Руте за дополнителни ракети за системите. Киев тврди дека „Патриот“ во моментов е неговата клучна одбрана од руските балистички ракети.

Украина, сепак, нема веднаш да стане независна од американските и европските испораки.

Воспоставувањето производство бара технолошки трансфер, договори со производителите и создавање индустриски синџир, па Киев паралелно продолжува да бара готови ракети од партнерите.

Одлуката затоа за Украина е пред сè долгорочна: наместо постојано да чека нови количества ракети од западните залихи, Киев сака дел од нив во иднина да ги произведува дома.

Трамп отвора врата, Песков гледа ново вооружување

Од Москва засега нема конкретна реакција на денешното тврдење на Зеленски за лиценцата. Но портпаролот на Кремљ Дмитриј Песков само два дена претходно предупреди дека Москва гледа продолжување на вооружувањето на Украина и дека европските држави бараат нови пари за купување оружје за Киев.

– Милитаризацијата на Украина навистина продолжува – рече Песков.

Тој истовремено оцени дека засега „нема предуслови“ преговорите да преминат на мировен колосек, иако тврдеше дека Москва останува отворена за разговори. Неговите изјави дојдоа додека Трамп и Зеленски во Њујорк разговараа и за можен прекин на нападите врз енергетската инфраструктура и за нов дипломатски формат со Русија.