СУВЕНИРОТ ШТО ХАЛАНД ГО ДОНЕСЕ ОД САД СТАНА ХИТ

Плишан ракун со шише виски стана неочекувана ѕвезда на враќањето на Ерлинг Халанд од Светското првенство во САД. Норвешкиот напаѓач беше забележан како го носи сувенирот при пристигнувањето во Осло по елиминацијата од Англија во четвртфиналето.

Набрзо се откри дека станува збор за сувенир наречен „Виски ракун“, кој се продава во продавницата „Вајлд Билс Вестерн“ во Далас.

„Ме следеше дома“

Халанд на платформата Икс објави фотографија со необичниот сувенир.

- Advertisement -

„Тој ме следеше дома“, напиша норвешкиот фудбалер.

Подоцна на Инстаграм побара помош од следбениците за да му избере име. Како предлози ги понуди „Каубој“, „Ренџер“, „ТЕКС“ и „Р.О.В.“, кратенка од „Ракун на тркала“.

Од Далас до Осло

Сувенирот бил купен минатиот месец кога норвешката репрезентација престојувала во Далас по победата над Брегот на Слоновата Коска во осминафиналето.

Видео на каналот на Халанд покажува како разгледува каубојски шешири, облека и сувенири во продавницата.

Сопственичката Џули Њупорт за „УСА Тудеј“ изјавила дека предметот чини 750 долари и дека по објавите на Халанд интересот нагло пораснал.