СУДОТ ВО ПУЛА ОДОБРИ ВОЛОДИМИР „З“ ДА Ѝ БИДЕ ИСПОРАЧАН НА ГЕРМАНИЈА

Володимир Журавлов, Украинецот кого Германија го сомничи за учество во саботажата на „Северен тек 1“ и „Северен тек 2“, ќе ѝ биде испорачан на Германија ако одлуката на судот во Пула стане правосилна.

Во приказната има речиси филмски пресврт: Журавлов бил уапсен додека работел на снимање филм инспириран од истата саботажа за која го бара Берлин. Неговото презиме напишано на латиница почнува со „Zh“, што предизвика големо внимание во германските медиуми.

Окружниот суд во Пула ја донел одлуката за екстрадиција на 18 септември, а страните биле писмено известени пет дена подоцна. По правосилноста на одлуката, хрватското Министерство за внатрешни работи треба да го предаде Журавлов на германските власти.

- Advertisement -

Неговиот адвокат Микола Катеринчук најави жалба, оценувајќи ја одлуката како пристрасна и политички мотивирана. Одбраната претходно се повикувала и на одлуката на полски суд, кој во 2025 година одбил да го предаде Журавлов на Германија. Хрватскиот суд оценил дека полската одлука не го обврзува да го одбие германскиот европски налог за апсење.

Журавлов бил уапсен во Пула на 19 август. Таму пристигнал за да работи како консултант на „Остров на змиите“, политички трилер инспириран од саботажата на „Северен тек“. Филмот го режира Даг Лајман, а меѓу актерите се Шон Пен и Адриен Броди.

Германските истражители го сомничат Журавлов дека бил еден од нуркачите во групата која во септември 2022 година поставила експлозив на гасоводите на дното на Балтичкото Море. Експлозиите на 26 септември оштетија повеќе линии на „Северен тек 1“ и „Северен тек 2“.

Во Германија веќе е во притвор уште еден Украинец осомничен во случајот, Сергеј Кузнецов. Германското федерално обвинителство поднесе обвинение против него во јуни годинава.