Претставници на Советот на ЕУ и на Европскиот парламент рано изутринава постигнаа договор за ажурирање на Директивата за возачки дозволи, со што, меѓу другото, се воведуваат „мобилни дозволи“, нови минималните барања поврзани со способноста на возачите, пробен период за новите возачи и возење со придружба за професионалните возачи почетници.
Како што јави дописникот на МИА од Брисел, се проценува дека постигнатиот договор ќе ја подобри безбедноста на патиштата во Европа, каде годишно животите ги губат речиси 20.000 лица.
Според главниот преговарач во име на Советот на ЕУ, полскиот министер за инфраструктура Дариуш Климчак, овие измени на правилата за возачки дозволи се одличен пример за тоа колку дигитализацијата е широко распространета во животите на Европејците.
– Благодарение на овие измени, правилата за издавање на возачките дозволи ќе бидат попаметни, поинклузивни и целосно прилагодени на нашето дигитално општество, а во исто време ќе обезбедат важно позитивно влијание врз безбедноста на патиштата во ЕУ – оцени Климчак, чија земја е актуелен претседавач со ЕУ.
Главната преговарачка на ЕП, германската европратеничка Јута Паулус истакна дека овие нови правила ќе го олеснат животот на луѓето, правејќи го подигитален, пофлексибилен и со помалку бирократија.
– Воведуваме единствени стандарди низ Европа и им олеснуваме на младите да станат возачи. Згора на тоа, ги зајакнуваме нашите волонтерски служби за цивилна заштита и се справуваме со недостигот на квалификувани работници во транспортниот сектор. Конечно, осигуруваме дека ничие право да вози не е ограничено поради долгиот период на обработка – порача Паулус, која доаѓа од редовите на Зелените.
Со измените се предвидува воспоставување единствена мобилна возачка дозвола на ниво на ЕУ до крајот на 2030 година, која ќе функционира паралелно со класичните физички дозволи. И двата типа дозволи за управување на автомобили или мотоцикли ќе важат 15 години од датумот на издавање, освен ако се користат и како лична карта, кога ќе имаат важност од 10 години, а дозволите за возење камиони и автобуси ќе треба да се обновуваат на секои пет години. Одделно, секоја земја членка на ЕУ има право да ја скрати важноста на возачките дозволи за лица постари од 65 години.
Дополнително се усогласуваат и процесите за медицински скрининг што се применуваат во земјите членки при издавање или продолжување дозволи, кои ќе вклучуваат и задолжителен кардиоваскуларен преглед.
Се воспоставува и пробен период за возачите почетници од најмалку две години, во кој за нив ќе важат построги правила и санкции за возење под дејство на алкохол или дрога.
За справување со проблемот со недостиг на професионални возачи се намалува старосната граница за стекнување дозвола за управување на камиони од 21 на 18 години, а на автобуси од 24 на 21 година, со тоа што лицето мора да има „сертификат за професионална компетентност“. Со измените се овозможува и издавање дозволи за возење на камиони или комбиња и на лица со навршени 17 години, но до постигнувањато на потребна старосната граница за управување со таков тип возила тие ќе мора да бидат придружувани од искусен возач.
Исто така, се поедноставува и процедурата за добивање возачка дозвола за автомобили за европските државјани кои не живеат во нивната матична земја членка на ЕУ.
Како дел од мерките за поголема безбедност во сообраќајот, се воведуваат нови барања за подобра подготвеност на возачите, како познавања за безбедното користење на мобилен телефон при возење, за ризиците од слепата точка, за безбедното отворање на вратите или за возењето по снег и во лизгави услови, како и „развој на доволна свест за ризикот по пешаците, децата, велосипедистите и другите ранливи учесници во сообраќајот“.
Усогласените измени сега треба да бидат одобрени од Комитетот на постојани претставници на владите на земјите членки на ЕУ (Корепер) и од Европскиот парламент.
