Согласно мерењата и набљудувањата на метеоролошките станици во земјава, месец јули 2025 година се карактеризира како екстремно топол и многу сушен во споредба со многугодишните просечни вредности (1991-2020 година)

Согласно мерењата и набљудувањата на метеоролошките станици во земјава, месец јули 2025 година се карактеризира како екстремно топол и многу сушен во споредба со многугодишните просечни вредности (1991-2020 година), соопшти УХМР.

Средномесечната температура се движеше од 18,5 степени Целзиусови во Лазарополе до 28,5 степени во Гевгелија. Споредено со просечните јулски средномесечни температури, за триесетгодишен период (1991-2020 година), годинашната температура беше натпросечна за 2,3 степени на ниво на држава. Средномесечната температура во Скопје Зајчев Рид изнесуваше 27,6 и беше 2,9 степени повисока од просекот.

Во државата беше најжешко на 26 јули

Највисоката максимална температура во државата, беше измерена на 26 јули во Скопје Гази Баба и изнесуваше 43,7 степени. Притоа, во Скопската котлина беше надмината апсолутната максимална температура на воздухот од 43,4 на 43,7 степени. Во Скопје беше надмината и апсолутната максимална среднодневна температура. Надминати беа апсолутните максимални температури и во Охрид и во Маврово. Во Охрид од 37,5 на 38,1, а во Маврово од 34,2 на 34,3 степени. Имаше појава на топлотен бран од почетокот на месецот до 8 јули и од 20 до 27 јули, на ниво на држава.

Во Лазарополе беше најстудено

- Advertisement -

Најниската минимална температура во текот на месецот беше измерена во Лазарополе, на 10 јули и изнесуваше 4,4 степени.

Месечната сума на врнежи во државата во јули варираше од 0,0 мм во Битола до 10,7 мм во Берово. Врнежите беа од дожд и град. Максимално дневно количество на врнежи од 8,7 мм беше регистрирано во Берово на 18 јули.

Споредено со јулската просечна вредност за многугодишен период (1991-2020 година), измерената месечна сума на врнежи беше 87% подпросечна на ниво на држава, посочуваат од УХМР.