Соединетите Американски Држави воведоа нова глобална политика на визни ограничувања насочена кон лица поврзани со интернет-измами, кибер-криминал и сексуални уцени преку интернет, оценувајќи дека ваквите активности претставуваат сериозна закана за безбедноста и финансиската сигурност на американските граѓани

Соединетите Американски Држави воведоа нова глобална политика на визни ограничувања насочена кон лица поврзани со интернет-измами, кибер-криминал и сексуални уцени преку интернет, оценувајќи дека ваквите активности претставуваат сериозна закана за безбедноста и финансиската сигурност на американските граѓани.

Американскиот државен секретар Марко Рубио соопшти дека мерките ќе се однесуваат на лицата кои се директно одговорни или се соучесници во кибер-криминал и други кривични дела извршени со користење дигитални технологии.

Според него, визните ограничувања, воведени врз основа на американскиот Закон за имиграција и државјанство, ќе важат и за членовите на потесните семејства на осомничените.

- Advertisement -

Рубио нагласи дека онлајн-инвестициските измами, кои, според американските власти, најчесто ги организираат кинески транснационални криминални групи, само во 2024 година ги оштетиле американските граѓани за најмалку 10 милијарди долари.

Тој посочи дека овие криминални активности се поврзани и со перење пари, корупција и трговија со луѓе.

Особена загриженост, според Рубио, предизвикуваат и случаите на таканаречена „сексторзија“ – сексуална уцена преку интернет, при што жртви најчесто се деца и малолетници.

– Администрацијата на претседателот Доналд Трамп ги користи сите расположливи средства – санкции, кривични постапки, заплена на имот, барања за екстрадиција и меѓународна полициска соработка – за разбивање на криминалните мрежи и санкционирање на сите што учествуваат во овие измами – изјави Рубио.

Новата политика претставува дел од пошироката стратегија на САД за засилување на борбата против глобалниот кибер-криминал и заштита на американските граѓани од сè почестите интернет-измами.