Сингапурско министерство: 52 лица уапсени во Кина во акција против пирамидални шеми

Кинеските власти уапсија 52 Сингапурци во покраината Гуангкси во полициска акција против пирамидални шеми и сродни кривични дела, соопшти денес Министерството за надворешни работи на Сингапур.

Министерката Сим Ан изјави дека Министерството за надворешни работи и полициските сили на Сингапур соработуваат со кинеските власти за да добијат повеќе информации, додека владата на Сингапур им обезбедува конзуларна помош на притворените, објави Ројтерс.

Амбасадата на Сингапур во Пекинг и Генералниот конзулат во Гуангжу остварија три посети на притворените за да ја проверат нивната состојба и да обезбедат конзуларна помош, вклучително и пренесување на барањата и пораките на притворените од нивните семејства, како и посредување за административни прашања, додаде таа.

- Advertisement -

„Во име на полицијата, би сакала да повторам дека Сингапурците треба да бидат претпазливи кога разгледуваат деловни или инвестициски шеми, без разлика дали се во странство или се домашни. Ова особено важи за шеми што вклучуваат регрутирање учесници, плаќање големи суми пари однапред или ветување невообичаено високи приноси“, рече Сим.

Портпаролот на кинеското Министерство за надворешни работи, Гуо Џиакун, им изјави на новинарите дека „полицијата истражува и се справува со случаите на кривични дела извршени во Кина од странски државјани во согласност со законот, целосно почитувајќи ги и заштитувајќи ги легитимните права и интереси на вклучените лица“.