ШПИОНСКА АФЕРА ВО ВИЛАТА НА ВОДНО: КОЈ ЛАЖЕ И ЗОШТО МИЦКОСКИ САКА ДА ГИ „ЗАБОРАВИМЕ ГЛОДАРИТЕ”?

Премиерот ги отфрла со збор, Обвинителството со документи тврди спротивно , судирот на две верзии на реалноста

Денеска македонската јавност се соочи со две сосема спротивни верзии на иста приказна. Од една страна , официјално обвинителство кое со месеци спроведува предистражна постапка за можна шпионажа во највисоките државни институции. Од друга , премиер кој вработените кои поднеле пријава ги нарекува „глодари” и препорачува да бидат заборавени.

Прашањето е едноставно: кој лаже и зошто?

- Advertisement -

ШТО ТВРДИ ОБВИНИТЕЛСТВОТО

Обвинителството за гонење организиран криминал и корупција веќе пет месеци спроведува предистражна постапка за сомневања за нелегални активности во Кабинетот на претседателката Гордана Силјановска-Давкова во вилата на Водно, поврзани со можно неовластено извлекување доверливи податоци.

Предметот бил оформен на 18 декември 2025 година, по известување добиено од МВР – Секторот за компјутерски криминал, кое се однесувало на настан од 24 ноември 2025 година и на „индиции за недозволени активности од висок државен интерес”.

Ова не е политичка изјава , ова е официјален документиран процес. Биле издадени наредби за извлекување податоци од персонални компјутери и лаптопи доставени од Кабинетот на претседателката до МВР за анализа и вештачење, а паралелно биле побарани и снимки од безбедносните камери.

Но тука доаѓа клучниот детал кој фрла сенка на целата работа: истрагата се соочила со застој откако Кабинетот на претседателката го известил Обвинителството дека не располага со копии од видео надзорот, а МВР со месеци не доставило ниту снимки, ниту информации дали воопшто се преземени активности за нивно обезбедување.

Некој активно го успорува случајот. Прашањето е , кој и зошто.

ШТО ТВРДИ МИЦКОСКИ

Премиерот Мицкоски вели дека анонимната група вработени која испратила пријава се всушност „шпионски талог на општеството, структури од минатото коишто се наоѓале во кабинетите како глодари на некои поранешни политичари, претседатели, премиери” и дека тие испраќаат анонимни дописи до обвинителства.

Мицкоски додал дека не би ги коментирал овие „глодари” бидејќи „треба да ги заборавиме“. Тука се поставуваат неколку клучни новинарски прашања:

Прво , ако се работи за безначајни „глодари” кои шират лажни вести, зошто обвинителството со сериозни ресурси пет месеци води предистражна постапка? Обвинителот не отвора случај поради анонимна пријава на „глодари” , тоа го прави само кога има сериозни индиции.

Второ , зошто баш МВР, кое е под директна надлежност на извршната власт, не ги доставува бараните докази? И покрај чувствителноста на случајот и можните безбедносни импликации, Обвинителството до денес не добило конечни извештаи, ниту целосна документација за преземените активности. Ова е институционална опструкција , без разлика кој стои зад неа.

Трето , јазикот. Премиерот не рече „предметот е неоснован” или „ќе соработуваме со истрагата”. Тој рече „заборавете ги”. Тоа не е јазик на државник , тоа е јазик на некој кој сака темата да исчезне.

ПАРАЛЕЛАТА КОЈА ПЛАШИ

Ако некој во или околу Кабинетот на претседателката навистина извлекол доверливи државни податоци, тоа е потенцијален безбедносен инцидент од прва категорија. Ако пак пријавата е лажна и мотивирана политички , тоа исто треба да се докаже транспарентно.

Ниту едната, ниту другата опција не се решава со зборот „глодари” и препорака за заборав.

ЗАКЛУЧОК:Овие три факти заедно не говорат за невиност , тие говорат за систем кој штити нешто.

Македонската јавност заслужува одговори. Не „глодари”. Не „заборав”. Одговори.

С.Денесовски