Шакира им овозможи незаборавен ден на децата од Уганда кои настапиja со неа на финалето на Мундијалот

Приказната на танцовата група „Гето Кидс“ од Уганда е една од оние што изгледаат како филмско сценарио. Од деца кои растеле во сиромашните квартови и на улиците на Кампала, тие стигнаа до најголемата светска сцена – финалето на Светското првенство 2026.

Младите танчари беа дел од историското шоу на финалето на Мундијалот, кое за првпат се организираше по примерот на спектакуларните настапи на Супербоул. На сцената на стадионот „Њујорк Њу Џерси“ кадешто настапија светски музички ѕвезди како Шакира, Мадона, Џастин Бибер и БТС, беа и децата од Уганда кои со години ја освојуваат публиката со својата енергија и талент.

- Advertisement -

„Гето Кидс“ започнале со снимање танцови видеа на улиците на главниот град на Уганда. Светската јавност првпат ги забележа во 2014 година кога се појавија во видеоспотот за песната „Sitya Loss“ на угандскиот музичар Еди Кензо. Нивната популарност дополнително порасна по настапот во шоуто „Britain’s Got Talent“ во 2023 година.

Денес имаат повеќе од девет милиони следбеници на Инстаграм и над 13 милиони на Тик-Ток, а зад себе имаат соработки со ѕвезди како Крис Браун и средби со фудбалски легенди како Лајонел Меси и Серхио Агуеро. Освоија и бројни меѓународни признанија, меѓу кои и награди за најдобра танцова група на африканските музички и забавни манифестации.

Инаку, групата е дел од фондацијата „Inspire Ghetto Kids“, невладина организација основана од Кавума Дауда, математичар кој и самиот како дете останал без родители и живеел на улиците на Кампала. Организацијата преку музика и уметност им помага на деца без родители и на деца од ранливи семејства, обезбедувајќи им дом, храна, образование и медицинска грижа. Денес поддржува околу 60 деца.

Токму еден нивен импровизиран танц на песната „Zoo“, која Шакира ја сними за анимираниот филм „Зутопија 2“, го привлекол вниманието на колумбиската ѕвезда. Воодушевена од нивната кореографија, таа ги поканила да настапат со неа на финалето на Светското првенство.

Пред големиот настап, Шакира посакала да помине повеќе време со нив. Пејачката ги прошетала низ Њујорк заедно со своите синови Милан и Саша, покажувајќи им дел од најпознатите знаменитости на градот.

– Децата од Уганда ни го променија животот. Времето поминато со нив беше магично и нѐ научи на многу работи. Пресреќна сум што конечно се тука во Њујорк и што ќе танцуваат со мене на финалето на Светското првенство – напиша Шакира на социјалните мрежи.

Фотографиите и видеата што ги објави покажуваат како пејачката, нејзините синови и младите танчари заедно ги истражуваат улиците на Њујорк, далеку од рефлекторите и сцената.

„Гето Кидс“ претходно беа дел и од познатата „She Wolf Walk“ – традиционалната прошетка на Шакира до сцената пред концертот во Њу Џерси. Пејачката подоцна призна дека тоа била една од најмагичните вечери на нејзината турнеја.

„Гето Кидс“ од Уганда прво ги освоија срцата низ целиот свет со нивниот настап во британското шоу за таленти во 2023 година кое ги претвори во глобална сензација и им донесе милиони нови обожаватели ширум светот. Сега, години подоцна, тие настапија заедно со глобалната суперѕвезда Шакира на финалето на Светското првенство во фудбал во 2026 година во Њу Џерси – момент што го заокружува целиот круг и ги инспирира луѓето насекаде низ светот.