Образованието е еден од главните приоритети на оваа влада. Во моментот имаме инвестициска активност од околу 2 милијарди денари за проекти во образованието, повеќе од 30 капитални инвестиции, 7 комплетно нови училишни згради, дваесетина се реновираат, спортски сали во Струга и во Битола, отпочнуваме со спортските сали – Кисела Вода и Аеродром, во план е продолжување на проектот за реконструкција на универзитетите, односно зградите на факултетите ФИНКИ и ФФК, отпочнуваме со кампусот „Мајка Тереза“, изјави премиерот Христијан Мицкоски, одговарајќи на новинарско прашање за време на посетата на општина Студеничани.
– Образованието претставува еден значаен фокус на оваа влада и така ќе продолжиме да се однесуваме. Истовремено, ќе продолжи и инспекцискиот надзор на оние високообразовни институции, но и оние други образовни институции, што не ги исполнуваат стандардите. Ќе бидат опоменати. Доколку не преземат ништо во насока на исполнување на стандардите, ќе мора да бидат затворени – нагласи премиерот.
Мицкоски рече дека децата треба да добијат европско знаење, а тоа може да го даваат институции што ги почитуваат законите и што нудат таков тип на пренос на знаење.
– Така што, реформата во образованието е навистина опсежна. Оваа година, нешто што не е за фалење, учениците ги добија книгите на 1 септември. Исто ќе биде и во следната година. Ние пред 10-15 години зборувавме за компјутер за секое дете, денеска сме среќни ако секое дете има учебник. Но, за жал, имавме цунами 7 години што и тоа не можеше да го направи онаа влада на СДСМ и ДУИ, па оваа влада мора буквално сите тие елементарни работи да ги прави – додаде премиерот.
Тој во рамки на кампањата „Каде што срцето е дома“, во организација на Министерството за локална самоуправа, присуствуваше на поставување камен темелник на реконструкција на локален пат.
