Руска манекенка поради сличноста со Халанд стана вирален хит

Последниве денови како да стана хит да бидеш двојник на Ерлинг Халанд. Иако жените за кои Интернетот се изјасни дека му се двојнички на славниот фудбалер, отпрвин не се воодушевени од споредбата, сепак, изгледа дека ја прифаќаат шегата на своја сметка.

Така, после американската инфлуенсерка, сега се појави и  видео од 24-годишната Анастасија Костромитина од Москва, за која многумина тврдат дека има необична сличност со норвешката фудбалска ѕвезда.

Видеото објавено од нејзината мајка собра повеќе од четири милиони прегледи за само неколку дена, а откако беше споделено на други платформи, вкупната гледаност порасна на десетици милиони. Доволно е да се погледнат неколку секунди за да стане јасно зошто споредбите го преплавија интернетот.

- Advertisement -

Мајката на Анастасија објави видео во кое нејзината ќерка ги имитира карактеристичните изрази на лицето, позите и прославите на головите на Халанд. Клипот брзо стана вирален, а коментарите само се нижеа.

Некои се пошегуваа дека двајцата би можеле да бидат поврзани, додека други напишаа дека „ДНК тест не е потребен“.
Анастасија признава дека на почетокот воопшто не била задоволна од споредбите.

– Поминав низ сите фази на негирање. На почетокот, не разбирав како луѓето мислат дека личам на Халанд. Искрено, дури и малку се навредив – рече таа.

Сепак, со текот на времето, таа се предомисли.

– Денес, воопшто не мислам дека е лошо да изгледаш како толку успешен спортист. Затоа решив да ја прифатам шегата и да се забавувам со неа.

Таа додаде и дека негативните коментари повеќе не ја мачат.

– Кога се појавија хејтери, сфатив дека видеото навистина стана вирално. Искрено, има многу повеќе позитивни коментари, а овие негативните само дополнително ја зголемуваат гледаноста.

Инаку, Анастасија е професионален модел и соработувала со брендови како што се Clarins, Dyson, Uniqlo и Lamode. Таа вели дека луѓето првпат ѝ кажале дека личи на Халанд пред околу четири години, но дури сега, благодарение на Светското првенство и брилијантните настапи на Норвежанецот, споредбата стана вирална.

Судејќи според реакциите на социјалните мрежи, многумина сметаат дека ова е една од најубедливите спортски „двојници“ што се појавиле во последниве години. И кога ќе го погледнете видеото, лесно е да се види зошто.