Русија и Северна Кореја отворија мост со кој се поврзуваат двете земји

Москва и Пјонгјанг направија нов чекор во продлабочувањето на соработката. Се очекува првиот патен мост меѓу двете земји да стимулира главно трговски и економски врски, но критичарите предупредуваат дека новата рута би можела да послужи и за воена соработка.

Во понеделник беше отворен мост на реката Тумен меѓу Русија и Северна Кореја, со што се воспостави првата патна врска меѓу соседните земји. Двете земји веќе имаат прекуграничен железнички и воздушен сообраќај. И Москва и Пјонгјанг објавија дека ова е дополнително зајакнување на врските меѓу земјите, кои се соочуваат со западни санкции.

„Отворањето на првата автомобилска врска дополнително ќе ги зајакне врските меѓу нашите пријателски земји“, рече рускиот премиер Михаил Мишустин во видео обраќање на церемонијата по повод отворањето на мостот во понеделник, според француската новинска агенција АФП.

- Advertisement -

Новиот мост, кој ја преминува реката Тумен, ќе овозможи поминување до 300 возила дневно, вклучувајќи камиони.

Директна врска за движење на севернокорејските војници?

„Завршувањето на мостот е важен настан што внесува нова динамика во нашата билатерална соработка и е клучен инфраструктурен елемент за економските врски меѓу Северна Кореја и Русија“, изјави севернокорејскиот функционер Пак Тае Сонг, цитиран денес од АФП.

Во меѓувреме, украинската организација за човекови права „Truth Hounds“ предупредува дека новиот мост меѓу двете земји би можел да стане „директна врска за движење на севернокорејски војници, службеници и градежни работници во Русија, додека руските суровини и технологија би течеле во спротивна насока“.

Русија и Северна Кореја во последно време ја зајакнуваат соработката и економските и воените врски, особено од почетокот на руската инвазија на Украина во 2022 година, по што следеа обемни санкции од западните земји. Северна Кореја, исто така, се соочува со западни санкции со години.

Пјонгјанг распореди илјадници војници во Русија во 2024 година, додека Киев постојано ја обвинува Москва дека користи севернокорејски ракети за напад врз Украина. Двете земји, исто така, потпишаа договор за одбрана во 2024 година, кој предвидува меѓусебна поддршка во случај на напад.

Рускиот туризам во Северна Кореја, исто така, расте во последните години, а централната банка на Јужна Кореја процени во јули дека економијата на Северна Кореја пораснала за повеќе од три проценти минатата година, трета година по ред. Таа го наведе проширувањето на економската соработка со Русија како „главен движечки фактор“ на растот.