Реализирани 60% од новиот граничен премин „Маркова Нога – Лемос“

Граничниот премин „Маркова Нога – Лемос“ претставува стратешки проект за регионот на Преспа, но и за целиот Балкан, истакна министерот за внатрешни работи Панче Тошковски при денешниот увид во градежните работи на македонско-грчката граница.

Тошковски нагласи дека Преспа е една од најубавите микролокации во Европа, додавајќи дека проектот има значајна вредност за двете пријателски држави.

– Преспа заслужува сите да вложиме максимум во рамките на нашите капацитети, затоа што ова е стратешки проект кој ќе даде додадена вредност од повеќе аспекти – за Преспа, но и за нашите две пријателски држави – изјави Тошковски.

- Advertisement -

Според најавите, изградбата на граничниот премин од македонска страна треба да биде завршена во септември оваа година, додека целосното завршување на целиот проект е планирано за 2028 година.

Евроамбасадорот Михалис Рокас истакна дека регионот на Преспа е од исклучителна важност и дека проектот има и еколошка димензија, бидејќи придонесува за заштита на природните богатства и зајакнување на соработката меѓу двете држави.

– Активностите од другата страна треба да завршат во февруари 2028 година. Проектот веќе е реализиран околу 60 проценти и работите се движат кон завршна фаза – посочи Рокас.

Постојаниот претставник на УНДП во земјата, Армен Григорјан, истакна дека Преспанското Езеро е уникатна природна вредност и дека е значајно што Светскиот ден на екологијата се одбележува токму во овој регион.

Граничниот премин „Маркова Нога – Лемос“ ќе има сообраќајница долга околу 350 метри со четири сообраќајни ленти, придружни објекти и модерни стандарди за меѓународен граничен премин.