Путин постави нов услов пред евентуалните мировни преговори со Украина, порачувајќи дека безбедносната зона што Москва планира да ја воспостави на украинска територија нема да биде предмет на договор со Киев

Претседателот на Русија Владимир Путин постави нов услов пред евентуалните мировни преговори со Украина, порачувајќи дека безбедносната зона што Москва планира да ја воспостави на украинска територија нема да биде предмет на договор со Киев.

Станува збор за зона што треба да се протега долж 660 километри од руско-украинската граница, додека Кремљ истовремено инсистира на целосна контрола врз регионот Донецк.

Путин изјави дека воспоставувањето на зоната е одговор на украинската воена операција во рускиот регион Курск во 2024 и 2025 година. Според него, руските сили веќе ја спроведуваат задачата за потиснување на украинските единици од пограничните подрачја.

- Advertisement -

– Нашата цел е да обезбедиме апсолутна безбедност на граничните региони на Русија во иднина и не планираме ова да биде тема на потенцијални мировни преговори со Украина – изјави Путин.

Со оваа порака рускиот претседател практично исклучи можност Москва да тргува со статусот на планираната зона во рамките на евентуален мировен договор.

Портпаролот на Кремљ, Дмитриј Песков, соопшти дека зоната ќе се протега долж 660 километри, од кои, според руските тврдења, околу 70% веќе се под контрола на руската војска.

Песков, сепак, не прецизираше колку длабоко во украинска територија би навлегувала зоната, што остава отворено прашање колкава површина Москва планира да стави под своја контрола.

За нејзиното целосно воспоставување руските сили би морале да освојат дополнителни територии во украинските региони Суми и Харков.

Овие два региона не се меѓу четирите украински области за кои Москва во 2022 година прогласи анексија, потег што Украина и голем дел од меѓународната заедница го сметаат за незаконски.

Иако Путин и претходно зборуваше за создавање безбедносна зона, досега не беше соопштен нејзиниот планиран обем, ниту толку категорично беше исклучена можноста за преговори за нејзиниот статус.

Москва го бара целиот Донецк

Паралелно со најавата за безбедносната зона, Путин повтори дека една од главните воени цели на Русија останува воспоставувањето целосна контрола врз Донецк.

Според неговите тврдења, украинската војска во моментов контролира нешто повеќе од 10% од територијата на регионот.

Рускиот претседател наведе и дека околу 16,5% од регионот Запорожје сè уште не се под контрола на Москва.

Русија го смета Донецк за дел од територијата што ја анектираше во 2022 година, иако не успеа воено да го освои целиот регион.

Москва бара украинските сили да се повлечат од преостанатите делови на Донецк како еден од условите за евентуален мировен договор.

Киев категорично го отфрла ова барање, оценувајќи дека предавањето територија што руската војска не успеала да ја освои би претставувало капитулација.

Украинските власти предупредуваат и дека таквиот договор не би гарантирал траен мир, туку би можел да ѝ овозможи на Русија да се подготви за нови напади.

Дроновите го забавуваат напредувањето

И покрај најавите на Москва за продолжување на офанзивата, состојбата на фронтот останува сложена, а руските и украинските сили водат интензивни борби на повеќе правци.

Воените аналитичари оценуваат дека двете армии во значителна мера меѓусебно се неутрализираат, што го отежнува постигнувањето поголеми територијални придобивки.

Една од главните причини е масовната употреба на беспилотни летала, кои го прават движењето на војниците и оклопната техника исклучително ризично.

Широките подрачја под постојан надзор и закана од дронови во воените анализи се опишуваат како „зона на смртта“.

Во последните недели украинските сили спровеле и контраофанзива во регионот Донецк, наречена „Вивалди“, насочена кон потиснување на руските позиции североисточно од Славјанск и Краматорск.

Овие два града остануваат меѓу најважните украински упоришта во делот од Донецк што сè уште е под контрола на Киев.