ПРВ КООРДИНАТИВЕН СОСТАНОК ВО РАМКИ НА ПРОЕКТОТ „ADVENTOUR II – ACCESSIBLE ADVENTURE ACROSS THE BORDERS“

Вчера во Охрид се одржа првиот координативен состанок во рамки на проектот „ADVENTOUR II – Accessible Adventure Across the Borders“, кој се реализира преку Interreg VI-A IPA Greece – North Macedonia Programme 2021–2027.

На состанокот, покрај претставниците на Општина Охрид, присуствуваа и претставници на сите проектни партнери: YMCA од Солун, Грција; Грчката национална туристичка организација; Мрежата за рурален развој од Скопје и Извидничкиот одред „Крсте Јон“ од Струга.

Целта на состанокот беше координација на активностите, дефинирање на следните чекори во имплементацијата на проектот, како и зајакнување на партнерската соработка за успешно реализирање на предвидените активности.

- Advertisement -

Во рамките на проектот, Општина Охрид ќе реализира активности за подобрување на пристапноста на 5 јавни плажи на охридското крајбрежје преку поставување современа урбана опрема, пристапни патеки, соблекувални и санитарни јазли, како и соодветни решенија што ќе им овозможат на лицата со попреченост полесен и побезбеден пристап до езерото.

– Со реализацијата на проектот се очекува значително подобрување на пристапноста на охридските плажи, зголемување на бројот на туристи со попреченост, подобри услови за безбедност и рекреација, развој на инклузивен и одржлив туризам, како и зајакнување на туристичката понуда. Покрај опремата, ќе биде набавено и возило за лицата со посебни потреби, кое Општина Охрид ќе го стави на располагање и ќе го сервисира, истакна Ѓоко Апостолов, раководител на Секторот за туризам и локален економски развој на Општина Охрид.

Димитрис Папас од YMCA од Солун истакна дека проектот е од големо значење за продлабочување на прекуграничната соработка и унапредување на туристичките потенцијали во пограничните региони.

– Проектот има за цел создавање прекугранична рута за пристапен авантуристички туризам која ќе ги поврзе планинските и езерските туристички дестинации во двете соседни земји. Чест ни е што ќе соработуваме со сите партнери во проектот и се надевам дека ќе реализираме успешни проектни активности, потенцираше Папас.

Од Мрежата за рурален развој од Скопје потенцираа дека им е чест што за првпат ќе работат на проектни активности во овој регион.

– Нашата улога ќе биде поголемо вклучување и зголемување на свесноста кај сите заинтересирани страни кои ќе бидат вклучени во овој проект, да ги поттикнеме и да организираме различни обуки кои ќе се спроведуваат заедно со партнерите. Се надевам и верувам дека преку проектот ќе овозможиме поголемо вклучување на локалните заедници, особено на лицата со посебни потреби за кои се наменети проектните активности, објасни Петар Ѓорѓиевски, претседател на Мрежата за рурален развој.

Со реализацијата на проектот „ADVENTOUR II – Accessible Adventure Across the Borders“ се очекува создавање нови можности за развој на пристапен и инклузивен туризам, подобрување на условите за туристичка понуда во прекуграничниот регион и поголемо вклучување на лицата со попреченост во туристичките и рекреативните активности.