Пробиотиците стануваат сè попопуларни – научниците велат дека не можат да ја заменат здравата исхрана

Сè поголем број реклами и кампањи на социјалните мрежи ги охрабруваат луѓето да купуваат пробиотски суплементи, додека овошјето, житариците од цело зрно и зеленчукот – кои навистина му се потребни на цревниот микробиом – се занемаруваат, според авторите на една нова студија.

Во труд објавен во септември во медицинското списание *Clinical Gastroenterology and Hepatology*, истражувачите изразуваат загриженост дека пробиотските капсули се користат како „замена за поквалитетна исхрана“.

Употребата на пробиотици зголемена за речиси 300 проценти
Истражувачите откриле дека потрошувачката на пробиотски суплементи пораснала за речиси 300 проценти во периодот меѓу 2009 и 2023 година, по анализата на податоците од американското Национално истражување за здравје и исхрана (NHANES), кое опфатило повеќе од 60.000 луѓе.

- Advertisement -

И покрај наглиот пораст на употребата на пробиотски суплементи, внесот на влакна не се променил значително, додека просечната потрошувачка на храна што го поддржува микробиомот се зголемила само незначително, забележале истражувачите.

Додека нешто помалку од два проценти од испитаниците постари од 20 години изјавиле дека земаат пробиотски суплементи во 2009 година, таа бројка се зголемила на речиси седум проценти до 2023 година. Уште поголем пораст е забележан кај поединците помлади од 20 години, пренесува DPA.

„Нашите резултати покажуваат дека луѓето не ја менуваат својата исхрана, иако сè повеќе од нив се доволно загрижени за својот микробиом за да земаат пробиотски суплементи“, изјави Кира Њуман, професорка на Медицинскиот факултет при Универзитетот во Мичиген.

И покрај растечката популарност на пробиотските капсули, Њуман истакнува дека бројни видови овошје и зеленчук нудат „добро утврдени здравствени придобивки за цревниот микробиом“. „Самите пробиотски додатоци не ја нудат истата разновидност и богатство. Тоа е како да избирате само една боја од виножитото“, предупреди Њуман, истакнувајќи дека не само овошјето и зеленчукот, туку и мешунките и интегралните житарки „поддржуваат широк спектар на корисни цревни микроорганизми“.