ПРИСТИГНУВА ДАНСКИОТ ИНВЕСТИТОР КОЈ ИМА НАМЕРА ДА КУПИ НАЈМАЛКУ 1.000 СТАНОВИ

Данскиот инвеститор Јенс Киндберг (Jens Kindberg), кој стои зад инвестициската групација Вексткапитал (Vaekstkapital), го проширува своето присуство во Македонија преку основање две компании поврзани со изградба на станбени објекти. Станува збор за друштвата Премиум Резиденце (Premium Residence) и Рубик Тауер (Rubik Tower), кои се регистрирани во земјава, а со кои раководи Киндберг, објави „Фактор“.

Податоците од данските деловни регистри покажуваат дека зад двете македонски компании стои сложена сопственичка структура. Нивен директен сопственик е Ве Ка Скопје Девелопмент (VK Skopje Development ApS), данска компанија преку која се реализираат инвестициите, додека повисоко во сопственичката структура се наоѓа луксембуршката Векств Холдингс (Vaekst Holdings S.à r.l.).

Според регистарските информации, Рубик Тауер (Rubik Tower ApS) и Премиум Резиденце (Premium Residence ApS) биле основани во Данска на 9 септември 2026 година. Во нивните податоци како директор е евидентиран Томас Нилсен (Thomas Nielsen). Компанијата Ве Ка Скопје Девелопмент (VK Skopje Development ApS), пак, е основана во декември 2023 година, а како нејзин сопственик се наведува Векств Холдингс (Vaekst Holdings S.à r.l.).

- Advertisement -

Влезот на инвестициската групација Вексткапитал (Vaekstkapital) на македонскиот пазар на недвижности е дел од поширока инвестициска стратегија, чија цел е создавање портфолио од најмалку 1.000 станови. Зад оваа иницијатива е Јенс Киндберг (Jens Kindberg), финансиски експерт со долгогодишно искуство во алтернативните инвестиции, како и во развојот на станбени проекти во Софија.

Првичните информации за обемот на инвестицијата беа објавени во февруари 2026 година. Тогаш гувернерот на Нардона банка Трајко Слевески изјави дека дека странска групација (Vaekstkapital Group) веќе купила 40 станови во централното подрачје, но не можеше да каже за каква намена. Подоцна беше објавена информација дека истиот инвеститор на поширокото градско подрачје има купено приближно 250 станови во изградба, со намера до крајот на годината да го зголеми бројот на станови во своето портфолио на најмалку 1.000.

Карактеристично за нивниот пристап е купувањето недвижности во многу рана фаза од изградбата, кога градежните работи биле на самиот почеток. Во реализацијата на набавките групацијата соработува со локални агенции за недвижности, но воспоставува контакти и директно со инвеститорите.

Сепак, досега не беше прецизирано каков ќе биде конечниот деловен модел за стекнатите станови. Останува отворено прашањето дали тие ќе бидат понудени на продажба по завршувањето на изградбата или ќе се чуваат како долгорочна инвестиција што ќе носи приходи од изнајмување. Неизвесноста околу идната намена на недвижностите отвора и прашања за нивното можно влијание врз понудата и цените на становите на домашниот пазар.

Векствкапитал (Vaekstkapital) е присутна на бугарскиот пазар од 2014 година. Според корпоративните податоци, Јенс Киндберг (Jens Kindberg) во 2022 година станал единствен сопственик на групацијата. Денес компанијата се позиционира како посредник и управувач со алтернативни инвестициски фондови, насочени кон недвижности, кредитни активности и финансиско-технолошкиот сектор.