ПРЕТРЕСОТ ВО ДОМОВИТЕ НА ПРИНЦОТ ЕНДРУ БИЛ НЕЗАКОНСКИ

Налозите со кои британската полиција влегла во два дома на поранешниот принц Ендру Маунтбатен-Виндзор биле незаконски, утврди Високиот суд во Лондон. Полицијата и одбраната на Ендру се согласиле дека при нивното издавање била направена сериозна правна грешка, поради која се доведува во прашање и законитоста на запленетите докази.

Сепак, судската победа не значи крај на кривичната истрага против братот на кралот Чарлс Трети.

Одлуката се однесува на претресите на имотот Сандрингам во Норфолк, каде што престојува Ендру, и на неговиот поранешен дом „Ројал Лоџ“ во Виндзор.

- Advertisement -

Судијата Хилијард на рочиштето во четвртокот, 8 октомври, соопштил дека двете страни постигнале согласност оти налозите биле незаконски.

– Постигнат е договор меѓу подносителот на барањето и полицијата на долината Темза дека налозите за претрес се незаконски – изјавил судијата.

Тој објаснил дека била направена значителна грешка при барањето и при издавањето на налозите, доволна за да ги направи незаконски и претресите и запленувањето на материјалите.

Полицајците при рациите одзеле документи и електронски уреди, кои сега се во центарот на нов правен спор.

Погрешен член од законот, спорни докази

Клучниот проблем е во правната основа врз која биле одобрени претресите.

Според „Скај њуз“, полицијата побарала налози според членовите 8 и 9 од британскиот Закон за полициски и кривични докази, но судија од Олд Бејли одлучил дека е доволен членот 8.

Подоцна било утврдено дека требало да се примени членот 9, кој предвидува посебни правила за пристап до одредени категории заштитен и доверлив материјал, меѓу кои и деловни записи.

Токму оваа разлика се покажала како пресудна за законитоста на полициската акција.

Договорот за поништување на налозите бил формализиран уште на 22 јули, но јавно бил обелоденет дури на рочиштето во четвртокот.

Интересно е што полицијата, иако прифатила дека налозите биле незаконски, не сака да ги врати запленетите материјали.

Надлежните тврдат дека можеби постои друга законска основа за нивно задржување, додека адвокатите на Ендру се противат на таквата можност.

– Нема смисла материјалите да се вратат ако можат законски да бидат запленети врз основа на друга одредба – објаснил судијата.

Прашањето дали полицијата ќе смее да ги задржи доказите ќе се разгледува на посебно судско рочиште зад затворени врати во 2027 година.

Апсење на роденденот и истрага за Епстин

Ендру бил уапсен на 19 февруари, на својот 66. роденден, под сомнение за злоупотреба на јавна функција.

Истрагата се однесува на обвинувањата дека за време на неговиот мандат како британски трговски претставник споделувал чувствителни информации со осудениот сексуален престапник Џефри Епстин.

По испрашувањето бил ослободен, но останал под истрага. Тој негира дека сторил нешто незаконско.

Судијата Хилијард нагласил дека поништувањето на налозите не значи дека целата полициска истрага е незаконска.

– Фактот дека налозите за претрес се поништени не ја завршува истрагата, ниту значи дека целата истрага била незаконска – истакнал судијата.

Полицијата на долината Темза потврдила дека продолжува да ги истражува сомневањата за злоупотреба на јавна функција.

Кралот нема да му ги плаќа судските трошоци

Дополнителен интересен детал е финансиската поддршка што Ендру ја добива од својот брат, кралот Чарлс Трети.

Поранешниот принц добива годишен надомест од приватните средства на кралот, но износот не е јавно објавен.

Извор од Бакингемската палата оваа недела нагласил дека парите не треба да се користат за финансирање на судската постапка против полицијата.

Чарлс му ги одзел на Ендру правото на принцовска титула и војводството од Јорк кон крајот на минатата година, поради контроверзиите поврзани со неговите контакти со Епстин.

Британските власти во меѓувреме продолжуваат со пошироката проверка на документите поврзани со Епштајн.

Во анализата учествуваат сите 43 полициски сили во Англија и во Велс, додека полицијата на долината Темза, лондонската Метрополитенска полиција и полицијата во Сари водат активни истраги.

Поранешниот принц, чии долгогодишни врски со Епстин предизвикаа голем скандал во британското кралско семејство, ги негира обвинувањата и по испрашувањето беше ослободен, но остана под истрага.