ПОТПИШАН „МОРАЛНО ОБВРЗУВАЧКИ ДОГОВОР“ ЗА ВЕШТАЧКАТА ИНТЕЛИГЕНЦИЈА

Претседателот на САД Доналд Трамп и шестмина од водечките американски технолошки директори потпишаа доброволен договор за безбедноста на развојот на вештачката интелигенција (ВИ), кој Трамп го опиша како „морално обврзувачки“, но кој нема правна сила.

Документот, насловен „Договор на Белата куќа за супер-интелигенција: Заедничка обврска за одговорностите на водечките ВИ-модели“, предвидува компаниите што развиваат напредни ВИ модели да воспостават четири нивоа на контрола и ревизија.

Компаниите треба да воведат внатрешни механизми за следење на способностите и однесувањето на моделите за време на нивната обука и употреба, особено во области како сајбер-безбедноста, биобезбедноста и хемиските закани. Контролите треба да спречат и ВИ системите ненамерно да хакираат или да пристапуваат до технички системи.

- Advertisement -

Предвиден е и посебен внатрешен тим кој ќе проверува дали овие механизми функционираат и дали евентуалните проблеми се отстрануваат. Потоа, независни надворешни ревизори или евалуатори треба да ја проверуваат работата на системите за контрола.

Четвртото ниво предвидува независен комитет во одборот на директори на секоја компанија, кој ќе ги следи извештаите на внатрешните тимови и надворешните ревизори и ќе се грижи за отстранување на утврдените проблеми.

Во договорот се наведува и дека компаниите ќе се состануваат редовно за да воспоставуваат стандарди и добри практики за подобрување на безбедноста на нивните системи. Документот остава отворена можност овие мерки во иднина да бидат преточени во закони или регулативи.

Сепак, во моментов станува збор за доброволна обврска и ниту една од мерките не е правно извршлива. Трамп го опиша договорот како нешто „речиси како устав“ и рече дека компаниите ќе спроведуваат „саморегулација“.

На ручекот во Белата куќа присуствуваа, меѓу другите, Дарио Амодеи од „Антропик“, Грег Брокман од „ОпенАИ“, Џенсен Хуанг од „Нвидиа“, Илон Маск од „Икс АИ“, Марк Закерберг од „Мета“, Џеф Безос од „Амазон“, Алекс Карп од „Палантир“, Сатја Надела од „Мајкрософт“ и Сундар Пичаи од „Гугл“. Формални потписници покрај Трамп се Пичаи, Амодеи, Закерберг, Брокман, Маск и Хуанг.

– Најголемите луѓе во светот го потпишаа тоа, и јас го потпишав како претседател. Тоа навистина е форма на заштита – изјави Трамп.