Продолжувајќи со засилените сообраќајни контроли ширум земјава, полицијата во текот на изминатите два дена (28 и 29 април) издала вкупно 1.425 платни налози за сторени прекршоци според Законот за безбедност на сообраќајот на патиштата и Законот за возила.
Најголем дел од казните се однесуваат на неправилно паркирање и пречекорување на брзината на движење, при што се санкционирани 415 возачи поради паркирање на недозволени места и 333 за возење над дозволената брзина.
Освен овие, биле регистрирани и 144 лица кои управувале возило без положен возачки испит, 71 возач бил санкциониран за неносење сигурносен појас, 64 возачи за користење мобилен телефон за време на возење, а 39 мотоциклисти за неносење заштитна кацига. Во шест случаи е забележано минување на црвено светло, кај 18 возачи било утврдено присуство на алкохол над дозволената граница, а санкционирани се и 15 пешаци за непочитување на сообраќајните правила.
Во согласност со Законот за возила, од сообраќај се исклучени 48 возила, од кои 14 поради техничка неисправност, а 34 бидејќи биле нерегистрирани.
Од Министерството за внатрешни работи информираат дека засилените контроли ќе продолжат и во наредните денови, особено поради претстојниот празник, кога традиционално има зголемен интензитет на сообраќајот.
„Апелираме до сите учесници во сообраќајот да ги почитуваат правилата, да не управуваат возила под дејство на алкохол и да бидат внимателни и одговорни. Само така можеме заеднички да придонесеме кон побезбедни патишта“, велат од МВР.
