Полицијата приведе Бугарин, протеран на една година

Бугарски државјанин е приведен на граничниот премин Деве Баир откако при влез во земјава кај него биле пронајдени метален боксирач и транспарент со навредлива содржина.

Инцидентот се случил вчера попладне околу 13:30 часот, кога полицијата, во соработка со царинските служби, извршила контрола на патничко возило „хонда џез“ со бугарски регистарски таблички. Возилото го управувал 47-годишниот Н.И.Л. од Бугарија.

При деталниот преглед, службениците го откриле металниот боксирач и транспарентот со навредлива порака, по што мажот веднаш бил лишен од слобода.

- Advertisement -

По брза постапка пред Основниот суд во Крива Паланка, на бугарскиот државјанин му била изречена парична казна, како и мерка протерување од државата во траење од една година.

Неколку часа подоцна, во текот на ноќта, тој бил спроведен назад на граничниот премин Деве Баир и предаден на бугарските гранични полициски служби.