ПИТОНИ И ДРУГИ ЗМИИ ЗАВРШИЈА ВО РАЦЕТЕ НА ЦАРИНИЦИТЕ

Царинските службеници на граничниот премин Богородица откриле обид за нелегален внес на змии и други влекачи во Македонија. Животните биле пронајдени при контрола на возило управувано од косовски државјанин, во соработка со полициски службеници, соопшти Царинската управа.

Според соопштението, влекачите биле спакувани во кутии и завиткани во марами, а потоа скриени под седиштето во возилото.

Меѓу запленетите животни има питони и други змии, вклучително и примероци за кои Царинската управа наведува дека припаѓаат на заштитени видови. Во соопштението се наведуваат два питона од видот „Carpet Spilota“, еден питон од видот „Short-tailed“, еден од видот „Brandly Carpet“, една змија означена како „Chinese Ring Rat“, како и примерок од видот „Reticulated Super Dwarf“. Царинската управа посочува дека меѓу запленетите змии има и отровна змија означена како „Baron Snake“.

- Advertisement -

Влекачите ќе бидат предадени на надлежните институции, а против лицето е поведена соодветна постапка, информираат од Царинската управа.

Оттаму потсетуваат дека меѓународната трговија со загрозени видови диви животни и растенија е регулирана со Конвенцијата за меѓународна трговија со загрозени видови на дива фауна и флора (CITES). За внес на видови опфатени со оваа конвенција се потребни соодветни дозволи, а внесувањето без нив се смета за недозволено.