Орбан: Клинтон бараше Унгарија да ја нападне Србија во 1999 година

Топ Вести - Слушај сега

Унгарскиот премиер Виктор Орбан изјави дека во 1999 година, за време на неговиот прв мандат, поранешниот американски претседател Бил Клинтон побарал од Унгарија да ја нападне Србија по копно, за да отвори втор фронт во средината на Косовската војна.

- Advertisement -

Орбан го изнесе ова тврдење за време на викендот на состанокот на Дигиталните граѓански кругови на Фидес во Сомбатели, пишува Телекс.

Според Орбан, Клинтон побарал Унгарија да ја нападне Србија или „барем да пука во нив од Унгарија преку Војводина, па сè до Белград“. Владата на Орбан, како што тврди, одбила, а на изричното барање на американскиот претседател одговориле со „Не, господине!“.

– Да имавме премиер тогаш кој знаеше само да каже „Да, господине“, ќе бевме во војна до вратот – заклучи Орбан.

Унгарскиот премиер вели дека потоа го прашал Клинтон што ќе се случи со 300.000 Унгарци што живеат во Војводина во тој случај. Тој тврди дека го предупредил Клинтон дека на огнот од една локација ќе се врати со оган и прашал: „Дали треба да дозволиме бомбардирање на Сегед, тоа е планот? Или на Ходмезовашархеј и Мако?“

Орбан рече дека се согласиле да разговараат за тоа лично на самитот на НАТО една недела подоцна, но тврди дека Американците никогаш повеќе не го отвориле прашањето.

– Можно е да се каже „не“ кога имате храброст да го направите тоа – им рече тој на присутните во Сомбатеј.

Додаде дека за неколку години, дипломатската историја ќе открие кои канали и информации биле користени за да се убеди американскиот претседател никогаш повеќе да не поднесе такво барање.

На зборовите на премиерот одговори Арон Табор, американски експерт и предавач на Универзитетот Еотвеш Лоранд. Тој истакна дека иако имало некои планови за копнена операција на НАТО за време на Косовската војна во 1999 година, немало вистинска политичка поддршка за нив и нема докази дека од Унгарија било побарано да ја нападне Србија.

Табор, исто така, изјави дека Бил Клинтон ја исклучил можноста за копнена операција на самиот почеток на бомбардирањето на Југославија, со цел да се намалат американските и сојузничките жртви. Иако таквата можност била дискутирана во Европа во тоа време, а Вашингтон пост објавил слични планови, лидерите на НАТО, според извештаите од тоа време, категорично негирале дека планираат копнен напад. Табор, исто така, се сеќава дека во тоа време самиот Виктор Орбан го информирал парламентот дека членовите на НАТО сметаат дека копнената операција е толку непотребна што дури и не била вклучена на агендата на самитот.

Ова не е прв пат унгарскиот премиер да изнесува такви тврдења. Орбан, исто така, во 2024 година изјави дека „тие“ сакале да ја вовлечат Унгарија во војната, но тој не го дозволил тоа.

Неговиот српски сојузник, Александар Вучиќ, во 2022 година тврдеше дека, според неговите сознанија, Клинтон го замолил Орбан да ја нападне Србија во 1999 година.