Околу 1,7 милиони домаќинства во Обединетото Кралство нема да го вклучат греењето оваа зима поради страв од високи сметки и обиди за заштеда на пари

Околу 1,7 милиони домаќинства во Обединетото Кралство нема да го вклучат греењето оваа зима поради страв од високи сметки и обиди за заштеда на пари, покажа најновата анкета.

Додека 5,7% од домаќинствата планираат да го остават греењето исклучено, 52% – односно повеќе од 15 милиони домови – велат дека се загрижени дека ќе им биде студено оваа зима, а 40% планираат да го вклучат греењето само, ако им стане премногу студено, покажа истражувањето спроведено за „Јусвич“ (Uswitch).

Речиси три од десет домаќинства (29%) ќе загреваат само одделни простории во нивниот дом, а речиси една петтина (18%) ќе го одложат вклучувањето на греењето за подоцна во споредба со минатата година.

- Advertisement -

Зголемувањето од 4% на горната граница на цените на енергијата одредена од регулаторот „Офгем“ стапи во сила од 1 октомври, додека аналитичарите предупредуваат дека сметките за домаќинствата би можеле да скокнат за речиси дополнителни 300 фунти (398 долари) од јануари.

Активистите ја повикаа владата уште сега да направи планови за поддршка на сите домаќинства со трошоците за енергија оваа зима поради сериозноста на предвидените зголемувања на сметките.

Меѓу оние кои планираат целосно да останат без греење, повеќе од една третина (37%) изјавиле дека избрале да се воздржат за да заштедат пари, иако технички би можеле да си дозволат греење на домот.

Нешто повеќе од една четвртина (28%) изјавиле дека растечките сметки за енергија го направиле греењето недостапно.

Половина од домаќинствата (50%) кои планираат да поминат без греење рекле дека ќе се свртат кон алтернативи како што се дополнителни слоеви облека, шишиња со топла вода и грејни ќебиња за да се загреат, додека 19% планираат наместо тоа да користат преносливи греалки, отворени камини или печки на дрва.

Седум од десет лица (72%) кои користат броила со припејд плаќање изјавиле дека се загрижени дека ќе им биде студено оваа зима – што е за 20 процентни поени над просекот во Обединетото Кралство.

– Алармантно е да се види дека толку многу домаќинства веќе планираат да поминат без греење оваа зима, пред уште и да пристигнат најстудените месеци. Трошоците за енергија штотуку се зголемија и повторно ќе пораснат во јануари, така што ова ќе биде тешка зима за многумина – и има смисла што многумина бараат начини да ја намалат потрошувачката на енергија – изјави портпаролот за енергетика на „Јусвич“, Бен Галичи.

Агенцијата „Опиниум“ (Opinium) анкетираше 2.000 возрасни лица во Обединетото Кралство во периодот меѓу 22 и 25 септември.

Uswitch е познат веб-сајт и бесплатна интернет услуга за споредба на цени и услуги со седиште во Велика Британија. Главната цел на Uswitch е да им помогне на корисниците да ги споредат цените на различни провајдери и да заштедат пари преку префрлање на поповолни договори. Uswitch најчесто се користи за споредба на тарифи за струја и гас за домаќинства, споредба на понуди за широкопојасен интернет, ТВ пакети и фиксна телефонија, споредба на договори за мобилни телефони, SIM-only картички и тарифи, споредба на кредитни картички, лични кредити и осигурување.