Нова размена на удари меѓу САД и Иран повторно го запали просторот околу Ормускиот Теснец, една од најважните нафтени артерии во светот

Нова размена на удари меѓу САД и Иран повторно го запали просторот околу Ормускиот Теснец, една од најважните нафтени артерии во светот. Оган се крена од иранските танкери кај клучниот остров Харг во Теснецот, еден брод потона во морето, а балистички ракети полетаа кон американска база.

Американската војска погоди 5 ирански танкери со сурова нафта. Американските сили прво им наредиле на екипажите да ги напуштат бродовите.

- Advertisement -

Нападот следуваше откако Иранската револуционерна гарда двапати лансирала ракети кон американски воен брод во последните 2 дена.

Американската Централна команда, Центком, соопшти дека бродот ги избегнал нападите. Ниту еден американски војник не беше повреден.

18 ракети соборени над Јордан

Иранската револуционерна гарда соопшти дека утрово возвратила за погодените танкери со балистички ракети врз американската база Ал-Азрак во Јордан и дека нападнала 10 бродови.

Техеран ги обвини овие бродови дека се обиделе да транзитираат низ новопрогласената „забранета и небезбедна зона“.

Јорданските власти соопштија дека пресретнале и уништиле 18 ирански балистички ракети. Уште 2 ракети паднале во оддалечени области. Нема пријавени повредени.

Иранските медиуми објавија дека експлозии одекнале во 2 американски бази во Јордан. Американската војска и јорданските власти не ги потврдија тие наводи.

Експлозии кај нафтеното срце на Иран

Харг е најважниот ирански терминал за извоз на нафта. Голем дел од нафтеното производство на земјата заминува преку островот.

Островот повеќепати беше цел и за време на Ирачко-иранската војна од 1980 до 1988 година.

Новите удари веќе се прелеваат и врз трговската пловидба. Сообраќајот низ Ормускиот Теснец падна на најниско ниво од мај, според податоците што ги објави Ројтерс.