Никогаш не стапнала во теретана и нема намера да се откаже од виното и цигарите

Американската манекенка и актерка Џери Хол го прослави својот 70-ти роденден на почетокот на јули, но малкумина би ѝ дале толку години.

Поранешната модна икона, која со децении доминираше на светските модни писти и насловните страници на списанијата, сè уште привлекува внимание со својот изглед и денес, а самата вели дека воопшто не се чувствува како седумдесетгодишна, пишува Дејли Меил.

- Advertisement -

Големиот јубилеј, односно, прославата на 70-тиот роденден го прославила во својот дом во Хенли, Англија, каде што собрала дури 200 пријатели и членови на семејството и повторно покажала дека возраста не е причина да се откаже од животните задоволства.

Иако сега има три внуци, таа сè уште снима модни едиторијали и отворено зборува за стареењето, убедена дека жените не треба да ги кријат своите години или да се обидуваат да изгледаат како некој друг.

За разлика од многу познати жени кои го одржуваат својот младешки изглед со естетски процедури, Хол никогаш не го криела фактот дека ботоксот и филерите не се нејзин избор.

– Што не е во ред со брчките? Имам многу од нив и воопшто не ме вознемируваат. Имам 70 години и нормално е да имам брчки. Не сакам да изгледам чудно или да ги плашам моите внуци – вели таа.

Слично размислува и кога станува збор за козметика. Таа вели дека нејзината рутина за нега на лицето е многу едноставна и дека не верува во производи кои ветуваат дека ќе го спречат стареењето.

– Користам природни производи и никогаш не купувам ништо на кое пишува „анти-стареење“ затоа што мислам дека тоа е навредливо – вели Џери Хол.

Таа, исто така, со години ја негува својата препознатлива долга руса коса и верува дека жените не треба да го менуваат својот изглед само затоа што стареат.

– Секогаш постои идејата дека кога жената старее, мора да ја скрати косата и да носи кратка сива фризура. Мислам дека тоа изгледа ужасно. Без оглед на тоа што пишуваат списанијата, мислам дека треба да се бориме за правото да старееме и да изгледаме добро.

Хол признава дека ретко посетува лекари и дека веќе три децении практикува холистички пристап кон здравјето. Таа е голем обожавател на Ајурведата, традиционален систем на лекување кој нагласува рамнотежа на телото, умот и духот.

Таа го посетува својот ајурведски лекар двапати годишно, кој ѝ го проверува пулсот, препорачува билки и советува која храна да ја вклучи во исхраната, а која да ја избегнува.

– Ми го мерат пулсот, ми даваат билки и ми кажуваат што треба да јадам и што треба да избегнувам. Ме мачкаат со масла, што е прекрасно. Тоа е како детоксикација. Живеам така 30 години и мислам дека е добро за мене – вели таа.

За разлика од многу нејзини колешки, таа признава дека никогаш не стапнала во теретана. Се одржува во форма многу поедноставно – со прошетки, јога и работа во својата домашна градина, каде што го поминува поголемиот дел од времето во текот на летото.

Иако внимава на исхраната, Хол не се двоуми да признае дека има свои пороци.

– Сакам да пијам вино со ручек и вино со вечера. Ако имам друштво, секогаш мора да има вино.

Покрај тоа што пие чаша розе вино секој ден, таа призна и дека пуши десет цигари дневно.

Сепак, со текот на годините, значително ги променила своите навики во исхраната. Се присетила како, како 16-годишна манекенка, речиси секое утро одела во париски пекари за да земе свеж кроасан и обожавала леб и чоколаден мус.

Денес, десертите и рафинираниот шеќер се минато.

– Шеќерот е навистина лош за телото – вели таа, додавајќи дека никогаш не била склона кон модни диети или готови оброци.

Таа обично јаде три оброци дневно, а во нејзиното мени доминираат органско овошје и зеленчук, јајца или овесни снегулки, супи и салати, додека за вечера избира риба, пилешко месо или разни чорби.

Кога станува збор за мода, Џери Хол не се согласува со стереотипите за тоа како треба да изгледа жената на нејзини години.

– Забавно е да се облекуваш на начин што одговара на твојата фигура. Имав среќа да ја задржам, па мислам дека треба да можам да носам што сакам.

Особено ја нервира општото мислење дека постарите жени треба да носат безлична облека и да се откажат од гламурот.

За Џери Хол, возраста никогаш не била причина да го промени својот стил, да се откаже од долгата коса или да ги скрие брчките. Наместо тоа, таа одлучила да го прифати стареењето како природен дел од животот и да живее според свои правила – со многу природа, едноставна рутина за нега на кожата, органска исхрана, чаша вино, по некоја цигара и верувањето дека убавината нема старосна граница.