Напад со беспилотно летало врз депо за гориво меѓу Судан и Јужен Судан: Загинаа најмалку 153 лица

Локален функционер изјави дека во напад со беспилотно летало врз депо за гориво во Абиеј – спорна погранична област меѓу Судан и Јужен Судан – загинале најмалку 153 лица.

Локалните власти за нападот, кој се случи вчера и предизвика пожар што сè уште гори, ја обвинија суданската војска. Се очекува бројот на жртви дополнително да се зголеми.

Висок претставник на суданската војска, кој сакаше да остане анонимен, изјави дека војската вчера извршила напад со беспилотно летало, при што цел биле цистерни со гориво што пристигнувале од Јужен Судан. Тој тврди дека горивото било наменето за паравоените „Сили за брза поддршка“ (RSF).

- Advertisement -

Функционерот наведе дека меѓу загинатите имало припадници на RSF, како и поединци вклучени во шверц на гориво.

„Ние не целиме кон цивили“, тврди тој.

Агенцијата АП не можеше независно да ги потврди неговите тврдења во врска со целите на нападот или идентитетот на загинатите.

Функционерот истакна дека нападот се случил надвор од демилитаризираната зона долж границата со Јужен Судан. Во соопштението објавено денеска, генералниот секретар на Обединетите нации ги осуди нападите со беспилотни летала, наведувајќи дека загинале десетици цивили – меѓу кои жени и деца – а многу други се повредени. Во соопштението не се прецизира кој ги извршил нападите.

Од ОН соопштија дека многу луѓе се водат како исчезнати и дека се очекува бројот на жртви да расте, додека Привремените безбедносни сили на ОН за Абиеј (UNISFA) продолжуваат да ги утврдуваат податоците за настраданите.

Мировната мисија распореди медицински персонал, опрема за гасење пожари и единици за брза интервенција, со цел да се пружи итна медицинска помош, да се помогне во евакуацијата на повредените и да се спречи ширењето на пожарите, се наведува во соопштението.

Организацијата „Лекари без граници“ (Médecins Sans Frontières) извести дека повеќе од 20 повредени лица се пренесени во болницата „Амет Бек“, каде што нивните тимови работат заедно со персоналот од Министерството за здравство на Јужен Судан.