Москва уште не одлучила дали ќе ги пушти Европејците на масата

Русија сè уште не одлучила дали ќе дозволи европски претставници да се приклучат на мировните преговори за Украина, соопшти Кремљ. Пораката од Москва доаѓа по најавите на американскиот претставник Стив Виткоф дека Европа ќе добие место на преговарачката маса на следната рунда разговори.

Портпаролот на Кремљ, Дмитриј Песков, изјави дека Москва најпрво сака да ги утврди вистинските намери на европските земји.

– Откако ќе разбереме какви се нивните вистински намери и дали се подготвени да придонесат во мировниот процес, ќе можеме да донесеме одлука за организирање разговори во проширен формат – изјави Песков.

- Advertisement -

Рускиот лидер Владимир Путин на преговорите изјави дека Москва никогаш не се откажала од преговори со Европа, но дека Европејците мораат да изберат дали сакаат војна или мир.

Претходно, украинскиот претседател Володимир Зеленски објави дека Европската унија ќе учествува во следната рунда мировни разговори.

Најавата следуваше по неговата средба со американските претставници Џаред Кушнер и Стив Виткоф во Даблин.

На пораката од Москва реагираше високата претставничка на Европската унија за надворешни работи и безбедносна политика, Каја Калас.

Таа нагласи дека Русија не може да одлучува за составот на европската делегација во евентуалните мировни преговори.

– Тие не одлучуваат – им рече Калас на новинарите по пристигнувањето на самитот во Даблин.

Според неа, Москва се противи на европско присуство во преговорите.

– Тие не сакаат силна страна во преговорите против нив, бидејќи сакаат да го истуркаат максимумот од своите барања – изјави Калас.