МНР СО ДЕМАНТ, НЕМА ОШТЕТУВАЊЕ НА ТАБЛАТА ВО СОФИЈА

Министерството за надворешни работи и надворешна трговија ги демантира информациите објавени во дел од медиумите дека наводно била оштетена и отстранета официјалната табла на Амбасадата на Македонија во Софија.

Од МНРиНТ велат дека станува збор за неточна информација, а таблата што била отстранета не била официјалната табла на Амбасадата.

„Од страна на вработените во Амбасадата е отстранета таблата поставена надвор од објектот на Амбасадата, која не била изработена согласно со воспоставените стандарди на Министерството“, соопшти Министерството.

- Advertisement -

Оттаму појаснуваат дека официјалните табли на Амбасадата, на кои името на државата е правилно испишано, се на своето место и целосно се во функција.

Реакцијата следува откако на социјалните мрежи беше објавена информација дека наводно била оштетена или отстранета официјалната табла на македонската дипломатско-конзуларна мисија во Софија, по што информацијата беше пренесена и од дел од медиумите.

Од Министерството апелираат информациите поврзани со дипломатско-конзуларните претставништва да се проверуваат преку официјални извори пред нивното објавување.

„Пласирањето и пренесувањето непроверени и неточни информации не придонесува за објективно информирање на јавноста и непотребно создава погрешна претстава во јавноста“, наведуваат од МНРиНТ.