Млада мајка го спасила своето осуммесечно бебе, но го загубила сопствениот живот при пад од 15.кат на станбена зграда во Бронкс во Њујорк

Млада мајка го спасила своето осуммесечно бебе, но го загубила сопствениот живот при пад од 15.кат на станбена зграда во Бронкс во Њујорк.

Дваесет и тригодишната Натали Рамирез го држела девојчето во прегратка кога, според полицијата, нејзиниот поранешен партнер ги турнал од балконот.

Истражителите веруваат дека мајката со своето тело го ублажила ударот при падот. Детето преживеало со тешки повреди и било пренесено во болница. Мајката починала.

- Advertisement -

Особено е потресен деталот дека осомничениот, 31-годишниот Ангел Караско, наводно ѝ донел цвеќе пред трагедијата, обидувајќи се да ја обнови нивната врска.

Наместо помирување, неколку часа подоцна се случила трагедијата што ја потресе њујоршката населба Алертон.

Инцидентот се случил на 6 октомври, околу 3:40 часот наутро.

Полицијата ги пронашла мајката и бебето со тешки повреди пред станбената зграда.

Според сведоштвата на соседите, непосредно пред падот од станот се слушале жестока расправија и повици за помош.

Еден сведок раскажал дека слушнал како жената го моли напаѓачот да престане и му кажува дека бебето е исплашено.

Караско побегнал по трагедијата, но полицијата го пронашла и го уапсила следната вечер.

Тој е обвинет за убиство, обид за убиство и други кривични дела поврзани со нападот.

Според американските медиуми, осомничениот и претходно бил поврзуван со пријави за семејно насилство.

Дополнително внимание предизвикале снимките од неговото изведување од полициската станица. Додека собраните граѓани му дофрлувале, камерите го забележале како се насмевнува.

Семејството на Натали Рамирез е убедено дека таа свесно го заштитила своето девојче во последните секунди од животот.

Нејзината мајка изјавила дека Натали го спасила детето, иако самата не успеала да преживее.

Соседите и пријателите организирале собир во нејзин спомен.