Медиуми: САД размислуваат за употреба на „мајката на сите бомби“ против Иран

Американската војска изготви нови планови за напади кои вклучуваат можна употреба на „Мајката на сите бомби“ (Mother of All Bombs) против иранската енергетска инфраструктура и нуклеарните постројки, доколку претседателот Доналд Трамп нареди почеток на воени операции. Ова го објави Си-Ен-Ен (CNN) во средата, повикувајќи се на неколку американски функционери запознаени со плановите.

Предложената употреба на GBU-43/B MOAB (Massive Ordnance Air Blast) – најголемата ненуклеарна бомба во американскиот арсенал – би претставувала значителна ескалација на конфликтот со Иран, иако некои функционери се сомневаат во нејзината ефикасност за постигнување на воените цели на Вашингтон.

Според Си-Ен-Ен, Трамп ѝ наложил на војската да подготви дополнителни опции за напади врз ирански цели, вклучително и енергетска инфраструктура и објекти поврзани со нуклеарната програма на земјата. Овие планови би можеле да бидат активирани пред или по претстојните избори за Конгресот на САД, доколку претседателот одлучи да започне големи воени операции.

- Advertisement -

Извор запознаен со процесот на воено планирање изјавил за Си-Ен-Ен дека предложените напади би можеле да се изведат пред повлекувањето на американските сили од зоната на одговорност на Централната команда на САД; ова би ѝ овозможило на администрацијата да изврши дополнителни напади пред да прогласи победа и да ги повлече своите трупи.

Друг извор навел дека плановите за напади врз иранските нуклеарни постројки – вклучително и една локација за која постои сомневање дека е подземна, позната како „Планината Пикекс“ (Pickaxe Mountain) – експлицитно ја вклучуваат опцијата за употреба на бомбата MOAB. Трамп во повеќе наврати се закануваше со напади врз „Планината Пикекс“, каде што, според Вашингтон и Израел, Иран чува компоненти од својата нуклеарна програма. Американскиот претседател нагласува дека спречувањето на Техеран да се здобие со нуклеарно оружје останува една од клучните цели на американската воена кампања.

Американски функционер изјавил за Си-Ен-Ен дека воените планери рутински подготвуваат различни опции за оние што носат одлуки – од операции со помал интензитет до помоќни напади врз силно утврдени цели.

Сепак, ефикасноста на бомбата MOAB против длабоко вкопани нуклеарни постројки останува неизвесна.

Оваа бомба – оружје наведувано преку GPS – може да уништи голема површина, приближно со големина на девет градски блокови, но не е дизајнирана да продира длабоко под земјата. Извори на кои се повикува CNN наведуваат дека таа веројатно не би можела да уништи објекти заштитени со дебели слоеви гранит и други утврдувања.

„MOAB е оружје наменето за постигнување масовен психолошки и пропаганден ефект; одлично е за расчистување големи површини, но не и за многу друго“, изјави за CNN извор запознаен со военото планирање, додавајќи дека бомбата не е соодветна за уништување цели длабоко под земјата.

Доколку се употреби, бомбата би можела да предизвика огромно уништување на местото на ударот, а нејзиниот широк радиус на дејство предизвикува сериозна загриженост во однос на можните цивилни жртви – особено ако целите се енергетска инфраструктура лоцирана во близина на населени места или други цивилни објекти. И покрај овие ограничувања, американските официјални претставници, наводно, го разгледуваат потенцијалниот психолошки ефект на ова оружје како дел од пошироките воени опции на администрацијата.

Еден извор изјави за CNN дека претседателот би можел да се соочи со притисок да преземе дополнителни дејствија против Иран, иако не е сигурно дека новите напади би го принудиле Техеран да ги прифати барањата на Вашингтон.

Според изворот, MOAB би можела да послужи како алатка за психолошки притисок – особено со оглед на ограничените можности на постојното оружје за уништување цели закопани длабоко под земјата.