Мастеркард најави дека веќе од февруари ќе поддржува вакви плаќања

Од февруари 2027 година, сите новоиздадени картички на Mastercard во Европа задолжително ќе поддржуваат офлајн плаќања (плаќање без интернет врска), а до мај 2027 година ова правило ќе важи за сите нови и заменски терминали за плаќање.

Офлајн плаќањата се наменети за ситуации во кои терминалот ја губи мрежната врска или доаѓа до прекин на електричното напојување. Во такви околности, корисниците ќе можат да ги плаќаат основните потреби во супермаркети, продавници за храна, бензински станици и аптеки, како и на автомати за продажба на билети за патување и влезници. Плаќањето ќе се врши со картичка со чип и ПИН-код.

Системот функционира така што чипот на картичката или дигиталниот паричник комуницира директно со ПОС-терминалот без да се бара моментална потврда од банкарскиот сервер. Трансакцијата се сними локално, а се комплетира и се наплаќа од сметката кога терминалот повторно ќе воспостави интернет врска.

- Advertisement -

Поради ризик од злоупотреба или немање пари на сметката, офлајн плаќањата обично се ограничени на помали парични суми и бараат периодична онлајн синхронизација. Банката на корисникот ја одредува висината на лимитот.

Плаќањата без интернет поддршка веќе се воведени во Данска, Шведска, Естонија и Латвија. За време на неодамнешното невреме во Латвија, плаќањата со картички продолжиле да функционираат во продавниците што користеле локални генератори за електрична енергија. Во Данска, пак, кризното постапување овозможило продолжување на голем број трансакции кај клучните трговци по технички дефект.

Во Македонија офлајн плаќањето во класична смисла (вршење трансакции во продавници каде што ПОС-терминалот воопшто нема интернет) моментално не е стандардна практика и не функционира на масовно ниво. Речиси сите стандардни купувања на продажни места бараат терминалот да биде поврзан онлајн со банката за да ја одобри трансакцијата во реално време.

Сепак, постојат неколку исклучоци на делумен офлајн режим. Ако купувате нешто во авион за време на лет над Македонија, терминалот на екипажот работи во офлајн режим бидејќи во авионот нема постојан интернет. Тогаш картичката се скенира, трансакцијата се прифаќа „на доверба“, а парите се одлеваат од сметка дури откако авионот ќе слета и терминалот ќе се поврзе на мрежа.

Дигитални паричници (Google Pay и Apple Pay) кои се достапни од македонските банки овозможуваат да направите неколку последователни плаќања во продавница дури и ако вашиот телефон е во „airplane mode“ или нема мрежа. Тоа е можно бидејќи апликацијата чува однапред преземени безбедносни токени. Сепак, терминалот на продавачот во продавницата мора да има интернет.

Бидејќи македонскиот банкарски систем и Народната банка ги следат регулативите на Европската Унија, регулативата на Mastercard за Европа автоматски ќе влијае и на нашиот пазар. Така, кога следната година новите картички на Mastercard во Европа ќе станат задолжително офлајн-компатибилни, македонските банки ќе мора да ги надградат своите системи и ПОС-терминали за да го прифатат овој начин на плаќање.