Американскиот претсседател Доналд Трамп го пофали рускиот колега Владимир Путин за ослободувањето на Американецот Марк Фогел велејќи дека Путин „има добра волја во врска со војната“.
– Вие би можеле да бидете голем дел од тоа, всушност, бидејќи тоа може да биде голем, важен дел од завршувањето на војната со Украина. И го цениме претседателот Путин за она што го направи. Тој можеше да го направи тоа за вас, нели? – рече Трамп, свртувајќи се кон Фогел додека стоеја заедно.
Фогел, кој во вторникот беше ослободен од затвор во Русија, пристигна во Белата куќа во вторникот вечерта. Тој беше обвиен со американско знаме кога се сретна со Трамп.
Фогел работеше речиси една деценија како професор по историја во Англо-американското училиште во Москва, каде што неговите ученици беа деца на американски дипломати.
Тој беше уапсен во август 2021 година на аеродромот Шереметјево во Москва, откако кај него беа пронајдени 17 грама канабис, за кој тврдеше дека го користел по лекарски совет за лекување на „тешки болки во ‘рбетот“.
Во јуни 2022 година, тој беше прогласен за виновен за „шверц на дрога од големи размери“ и осуден на 14 години во руски логор за принудна работа.
Фогел не беше вклучен во повеќекратна размена на затвореници за време на администрацијата на поранешниот претседател Џо Бајден, вклучително и онаа во август кога ги ослободи новинарот Еван Гершкович и поранешниот маринец Пол Вилан. Рускиот Врховен суд во декември одби да ја разгледа жалбата на Фогел против неговата 14-годишна затворска казна.
Трамп потврди дека се очекува да биде ослободен уште еден американски државјанин, но не прецизираше за кого станува збор.
Голем број Американци сè уште се во притвор во Русија, а најмалку двајца се етикетирани како „незаконски уапсени“, Стивен Хабард и руско-американската државјанка Ксенија Карелин.
Виткоф, кој лично отиде во Русија за да го врати Фогел, е првиот висок американски функционер што ја посетил Русија од почетокот на војната во Украина во февруари 2022 година, според Си-Ен-Ен.
