Макрон најави дека крадците и вандалите ќе одговараат кривично

Тие што напаѓаа, вандализираа и ограбија префектури и претпријатија за време на вчерашните насилни протести во Франција ќе бидат кривично гонети и казнети, порача францускиот претседател Емануел Макрон.

„Во Франција нема место за насилство“, објави Макрон на платформата Икс.

Ја изразувам поддршката на нацијата за полицијата, додаде тој.

- Advertisement -

„Сите ќе се бориме обединето против оние кои сеат хаос, кои сакаат само да ги уништат нашите институции и да ги спречат оние што мирно ги изразуваат своите барања да го прават тоа“, предупреди Макрон.

Францускиот премиер Себастијан Лекорну потврди дека во немирите низ Франција се уапсени 1.200 демонстранти и оцени дека за време на протестите се случило „неприфатливо ниво на насилство“.

За време на обиколката и прошетката низ улиците на Париз, во придружба на силни полициски сили, Лекорну порача дека „правдата ќе биде задоволена“.

Лекорну, исто така, соопшти дека 150 полицајци и жандарми се повредени во немирите низ целата земја.

Насилните протести што избувнаа низ Франција синоќа прераснаа во вандализам, пожари и масовни грабежи на продавници. Според извештаите, демонстранти упаѓале во продавници за луксузна стока, маркети, пекарници и продавници за електроника, при што биле ограбени објекти на познати светски брендови, меѓу кои „Ермес“, „Луј Витон“, „Диор“, „Ролекс“ и „Епл“.

Во Париз се испразнети рафтовите на продавниците за луксуз, во Марсеј се демолирани десетици продавници. Грабежи се регистрирани и во Бордо, во северниот град Лил и на југот на Франција во  Ница, каде биле ограбени продавници за спортска опрема, како и салон за мотоцикли.