Македонија има најевтини горива во регионот

ВМРО-ДПМНЕ излезе со регионална споредба на цените на бензинот и дизелот, оценувајќи дека мерките преземени за време на енергетската криза веќе даваат резултати.

„Македонија останува со најниски цени на горивата од земјите во регионот“, се тврди во партиското соопштение.

Според податоците што ги објави партијата, литар бензин БС-95 во Македонија чини 99 денари. Истата цена од 99 денари е утврдена и со најновата одлука на РКЕ, која важи од 22 септември.

- Advertisement -

ВМРО-ДПМНЕ во својата споредба наведува цена од 129 денари во Грција, 126 во Албанија и 108 денари во Србија. Потоа следуваат Хрватска со 107, Црна Гора и Словенија со 106 и Босна и Херцеговина со 104 денари за литар.

„Македонските граѓани трошат помалку за да ги наполнат своите резервоари на возилата и со тоа им останува повеќе во нивните семејни буџети“, соопшти ВМРО-ДПМНЕ.

Кај дизелот, домашната максимална малопродажна цена од 22 септември изнесува 104,50 денари за литар. Тоа е поскапување од 5,50 денари во однос на претходната цена.

Според регионалната споредба што ја достави ВМРО-ДПМНЕ, дизелот во Албанија чини 147 денари за литар, во Грција 126, а во Србија 124 денари. Партијата наведува цени од 122 денари во Словенија, 119 во Хрватска, 117 во Црна Гора и 116 денари во Босна и Херцеговина.

„Ова се реалните цени на горивата во Македонија и во регионот“, наведува ВМРО-ДПМНЕ во соопштението.

Партијата пониските домашни цени ги поврзува со интервенциите кај даноците и акцизите.

„Ова е доказ дека добро испланираните и применети мерки за намалување на цените, како што е намалувањето на ДДВ и акцизите, даваат резултати и ги држат под контрола малопродажните цени“, соопшти ВМРО-ДПМНЕ.

Владата претходно ја намали стапката на ДДВ за дизелот од 18 на 10%, а во најновата пресметка на РКЕ е применет и намален износ на акцизата од 4 денари за литар кај бензините и дизелот.

„Владата предводена од ВМРО-ДПМНЕ секогаш се води од интересот на државата и стандардот на граѓаните“, наведува партијата на крајот од соопштението.