Мајка од Загреб е осомничена дека повеќе од една година сурово ги злоставувала синот и ќерката, а меѓу доказите што ги добиле истражителите има и снимка долга 17 минути и 36 секунди

Мајка од Загреб е осомничена дека повеќе од една година сурово ги злоставувала синот и ќерката, а меѓу доказите што ги добиле истражителите има и снимка долга 17 минути и 36 секунди. Девојчето на неа плаче и држи нож на вратот, додека мајката, според наводите во истрагата, ја навредува наместо да ја смирува, пишува Индекс.

Децата во март биле одвоени од семејството и сместени во надлежна институција. Судот проценил дека постои опасност од повторување на насилството и можност за влијание врз децата, па на мајката ѝ забранил да им се приближува и да комуницира со нив.

Сведокот застанал меѓу мајката и детето

Сведочењата опишуваат повеќе инциденти. Еден сведок тврди дека видел како мајката со книга силно го удира момчето по главата, по што морал физички да застане меѓу нив.

- Advertisement -

Истиот сведок раскажал дека девојчето било удирано и навредувано, а во еден момент врескало и избегало од станот. Момчето, пак, според неговиот исказ, станувало сè поповлечено.

– Не можам да живеам со мајка ми или сестра ми, ме убиваат – му рекло момчето, според неговото сведочење.

Истражителите добиле и снимка на која мајката неколку минути му вика на момчето, го навредува и пцуе. Во заднината, според описот на доказниот материјал, се слушаат и звуци што упатуваат на повеќекратни удари.

17 минути со нож на вратот

Уште потешка е втората снимка. Девојчето за време на видеоповик плаче, зборува дека сака да умре и држи нож на вратот. Снимката трае 17 минути и 36 секунди.

Според изворниот текст, мајката во тие моменти ја нарекува „луда“ и ѝ зборува дека ќе заврши во болница.

Еден од сведоците опишал и друг инцидент по кој девојчето било хоспитализирано. Тој тврди дека мајката претходно ја претепала, а потоа заминала во Копенхаген. Детето подоцна добило напад и завршило во болница.

Кога стручните служби разговарале со децата, тие првично ја бранеле мајката и негирале дел од наводите. Откако им бил пуштен дел од снимениот материјал, кај момчето биле забележани знаци на вознемиреност.

Судот на мајката ѝ забранил да се приближува на помалку од 100 метри до децата и да воспоставува контакт со нив преку телефон, пораки, социјални мрежи или на друг начин.