МАГИЧНАТА БРОЈКА 200 ГО ВНЕСЕ ЈОКИЌ ВО ИСТОРИЈАТА НА НБА

Кошаркарскиот ас Никола Јокиќ стана вториот кошаркар во историјата на НБА што забележал 200 трипл-дабл остварувања во регуларната сезона. Српскиот центар ја достигна историската бројка во победата на Денвер над Њу Орлеанс со 104:91. Пред него тоа му успеало единствено на Расел Вестбрук, кој ја заврши кариерата со рекордни 209 трипл-дабл остварувања.

Јокиќ го одигра натпреварот со 21 поен, 13 скока и 10 асистенции. За 31-годишниот Србин ова беше втор трипл-дабл во новата сезона, а јубилејниот 200. го постигна во својата 12. сезона во НБА.

Вестбрук, кој летово се пензионираше, до рекордот стигна во текот на 18 сезони. Интересно е што и тој го забележа својот 200. трипл-дабл додека настапуваше за Денвер.

- Advertisement -

На Јокиќ сега му недостигаат само 9 вакви остварув ања за да го израмни рекордот. Со уште 10 ќе стане новиот рекордер во историјата на најсилната кошаркарска лига.

Денвер ја контролираше играта против Њу Орлеанс и во првото полувреме имаше предност од 22 поена. Домаќините успеаја да ја намалат разликата на само 5 поени во последната четвртина, но гостите ја сочуваа победата.

Џамал Мареј постигна 23 поени за Денвер, додека Арон Гордон додаде 15 поени и 11 скока. Кај Њу Орлеанс најефикасен беше Зајон Вилијамсон со 25 поени.

Јокиќ и Денвер веќе еднаш го совладаа истиот противник во новата сезона, но на многу подраматичен начин. На 24 октомври, тимот надомести негатива од 23 поени и победи со 141:135 по продолжение.

Српскиот центар тогаш забележа 35 поени, 15 скока и 10 асистенции. Тоа беше неговиот 199. трипл-дабл, додека Мареј ја предводеше офанзивата со 42 поена.

Меѓу двата натпревара против Њу Орлеанс, Денвер загуби од Голден Стејт со 134:114. Тимот ја започна сезоната со 2 победи и 2 пораза.

Јокиќ минатата сезона забележа дури 34 трипл-дабл остварувања. Во првите 4 натпревари од сезоната 2026/27 веќе има две, а неговиот просек изнесува 22 поени, 10,5 скока и 9 асистенции.