Летото е период кога илјадници возачи тргнуваат на подолги патувања, но многумина забораваат на една важна работа, редовната ротација на повеќесезонските гуми

Летото е период кога илјадници возачи тргнуваат на подолги патувања, но многумина забораваат на една важна работа, редовната ротација на повеќесезонските гуми. Според експертите, токму нерамномерното трошење на гумите може да влијае врз управувањето и сопирањето на возилото.

Повеќесезонските гуми стануваат сè попопуларни бидејќи ја елиминираат потребата од сезонска замена. Сепак, тоа не значи дека не бараат редовно одржување.

Предните гуми се трошат побрзо

Кај автомобилите со преден погон, кои се најзастапени на патиштата, предните гуми носат најголем товар. Тие управуваат со возилото, ја пренесуваат силата на моторот и учествуваат во сопирањето.

- Advertisement -

Поради тоа, предните гуми се трошат значително побрзо од задните, што може да доведе до намалена стабилност и подолг пат на сопирање.

Ротација на секои 10.000 до 15.000 километри

Според германскиот автомобилски клуб АДАЦ, повеќесезонските гуми треба да се ротираат на секои 10.000 до 15.000 километри.

Возачите кои најчесто возат низ град, на кратки релации или управуваат со потешки возила, како електричните автомобили, треба почесто да ја проверуваат нивната состојба.

Експертите советуваат, ако се заменуваат само две гуми, новите секогаш да се поставуваат на задната оска, додека постарите, доколку се во добра состојба, се преместуваат напред.

Не заборавајте и на притисокот

Освен ротацијата, важна е и редовната проверка на притисокот во гумите, особено пред подолго патување. Неправилниот притисок може да предизвика побрзо трошење, послабо сопирање и поголема потрошувачка на гориво.

Експертите препорачуваат редовна контрола и на длабочината на шарата, бидејќи и најквалитетните повеќесезонски гуми ја губат ефикасноста кога ќе се истрошат.