Костимите за Ноќта на вештерките се повлекуваат од продавниците во Полска поради насилство во училиштата

По серијата напади со ножеви во училиштата, големите трговски ланци во Полска ги повлекуваат маските и костимите за Ноќта на вештерките, како и пластичните играчки-оружја – како што се ножеви, секири и сатари – и вештачката крв.

„Сакаме нашата сезонска понуда да поттикнува позитивни емоции и заедничка забава“, изјави Малгожата Полаковска за националниот сервис TVP.info, во врска со повлекувањето на одредени костими од трговскиот ланец „Биедронка“ (Biedronka).

„Биедронка“, заедно со странските ланци „Акшн“ (Action) и „Карфур“ (Carrefour), соопштија дека повлекувањето на маските извалкани со крв и костимите со хорор-тематика – кои вклучуваат пластични или гумени ножеви, сатари и секири – е директно поврзано со неодамнешната серија на насилни инциденти во кои малолетници нападнале свои врсници или наставници со ножеви.

- Advertisement -

Трговскиот ланец „СМИК“ (SMYK) отиде најдалеку, повлекувајќи ги сите пластични и гумени реплики на опасни предмети.

„Се водевме од нашето чувство за општествена одговорност и од чувствата на родителите и децата. Ваквите предмети немаат место во асортиманот на продавница што е наменета за родители и деца“, изјави Катажина Чеховска-Јакубовска, маркетинг-специјалист во овој ланец. Минатата недела цела Полска беше зафатена од паника поради наводен онлајн предизвик познат како „Крвав петок“. Ова уследи по инцидентот што се случи два дена претходно во градот Остроленка, каде што 19-годишен ученик избоде девет лица – од кои петмина беа ученици – како и по друг инцидент во четвртокот во Лешчидол-Новини, каде што 15-годишен ученик нападна наставници и смртно го рани училишниот домар.

Во оваа атмосфера на страв се случија и некои бизарни ситуации. На пример, во Краков, полицијата реагирала на пријава за напаѓач, но открила дека станува збор за 10-годишно дете кое дошло на училиште во костим за Ноќта на вештерките, носејќи играчка – мала пластична сатара.

**Засилени безбедносни мерки**
Полската полиција воведе засилени безбедносни мерки. Во текот на изминатата недела, тие патролираа во близина на училиштата и вршеа проверки во самите училишни објекти – при што досега се спроведени вкупно 162.000 инспекции. Овие активности беа поттикнати од 482 пријави или информации собрани од службеници кои ги следат социјалните мрежи.

Приведени се вкупно 187 лица – главно на возраст меѓу 13 и 15 години – првенствено поради објавување закани на социјалните мрежи или обиди за внесување ножеви, односно пластични играчки-оружја што наликуваат на вистински сечила, во училиштата. Во некои случаи, самите родители ги довеле своите деца во полициските станици откако откриле дека тие на интернет се фалат со планови за извршување штетни дејствија во училиштето. Според полскиот премиер Доналд Туск, неодамнешната серија од шест напади со ножеви – кои започнаа на 22 септември и во кои малолетници нападнаа ученици или наставници, при што во еден од инцидентите ученик го уби училишниот домар – не била дело на организирана група со однапред смислен план, туку станува збор за низа спонтани дејствија.

„Станува збор за спонтани постапки што се одраз на активностите на социјалните мрежи. Во последните месеци и години, забележуваме растечка фасцинација од насилството. Како во Полска, така и ширум светот, се соочуваме со еден многу мрачен тренд на насилство“, изјави Туск за време на викендот.

По серијата апсења, специјализираните семејни судови за малолетници веќе донесоа и први одлуки.

Деветнаесетгодишен ученик од Остроленка, кој изврши напад минатата среда, е ставен во тримесечен притвор. Во меѓувреме, 15-годишник кој со нож усмрти 37-годишен училиштен домар во Лешчидол-Новини, е испратен во поправен дом за малолетници.

Некои малолетници кои не ги спровеле своите закани во дело – но сепак упатувале закани и ширеле паника на интернет – исто така ќе поминат неколку месеци во поправен дом, додека други биле само сослушани и им било дозволено да се вратат дома.