Борбата против прекумерниот број гулаби во бриселската општина Иксел наиде на неочекувана пречка. Програмата за контрола на раѓањето кај гулабите, која ветуваше дека ќе ја намали популацијата на хуман и ефикасен начин, одеднаш е суспендирана.
Според белгискиот весник DH Les Sports+, Иксел ги хранел гулабите со специјална мешавина од храна и контрацептивни средства, метод кој се покажал успешен во многу градови низ целиот свет.
Храната содржела никарбазин, супстанца која привремено ја намалува плодноста кај гулабите, без штетни ефекти врз другите видови.
Од 2021 до 2024 година, мерката доведе до намалување на популацијата на гулаби во општината за околу 40 проценти. Сепак, поради процедурални проблеми со јавните набавки и истекот на договорот, проектот беше привремено паузиран.
Експертите предупредуваат дека оваа пауза би можела да ја поништи целата досегашна напорна работа.
„За само неколку месеци, можеме да изгубиме до 40 проценти од вложениот труд“, изјави за весникот Кевин Лебрун од здружението за заштита на животните „Ле Нишоар“, кое ја спроведе програмата.
Во Иксел се надеваат дека проблемот ќе биде брзо решен и дека контрацепцијата за гулабите ќе продолжи, пред градските улици повторно да бидат „опсадени“ од пердувести сограѓани и нивните несакани траги.
